Ули Хенес во последно време беше доста популарен поради инволвираноста која ја имаше во преговорите за Флоријан Вирц, но сега една од најголемите легенди на Баерн Минхен го привлече вниманието поради влошена здравствена состојба.
Како што информираат германските медиуми, почесниот претседател на Баерн вчера итно бил пренесен во една позната болница во Бон, откако претходно му се слошило за време на еден важен голф настан во близина на овој град.
„Телеком“ како главен спонзор на Баерн Минхен ги имал и најважните лица на клубот на овој настан, но во еден момент, Хенес почувствувал потешкотии и експресно бил пренесен во болница.
Како што јавува „Билд“, лекарите утврдиле дека станува збор за пукната вена која може да предизвика големи компликации, но во случајот на Хенес, работите не излегле од контрола и состојбата брзо му била стабилизирана.
Истиот извор открива дека Хенес уште вчера вечер бил пуштен на домашно лекување, па непријатната ситуација брзо била ставена под контрола.
