Фонтана ди Треви се смета за една од најубавите барокни фонтани во светот која ја смислил и започнал Никола Салви, а ја завршил Џузепе Панини во 1762 година.
Градењето на фонтаната чинело 17.647 скуди, тогашна валута на папската држава.
Првата голема обнова на фонтаната започнала во 2014 година и траела речиси една година и пол со финансиска помош од модната куќа „Фенди“, од речиси 2 милиони евра која сакала да им помогне на градските власти во зачувување на римската култура.
На нејзиното реновирање и реконструирање потрошени биле 327.000 евра.
Фонтана ди Треви дневно ја посетуваат илјадници туристи од целиот свет кои доаѓаат поради нејзината убавина, но и традицијата на фрлање паричка и верување дека тоа носи среќа и остварување на желбата.
Секој ден, по затворањето на местото за посетителите, фонтаната се празни, а парите кои се наоѓаат во неа се собираат и носат.
Се проценува дека туристите секојдневно оставаат над 3.000 евра монети, односно милион до милион и половина годишно. Од 2001 година сите парички кои ќе завршат во фонтаната одат во католичкиот хуманитарен фонд којшто парите ги користи за набавка на храна и различни хуманитарни програми ширум светот.
Традиција на фрлање парички
Легендата вели дека доколку со десната рака фрлите паричка над левото рамо, тоа ви носи среќа и остварување на желбата, но и враќање во Рим.
Оваа магична фонтана во Рим овековечена е и во неколку култни филмови од кои најпознати се „Три парички во фонтаната“ од 1954 година и „Кога си во Рим“ од 2010 година.
