Неврохирургот д-р Меган Е. Марфи од клиниката „Мајо“ вели дека болката може да се контролира на три начини.

1. Одржувајте идеална телесна тежина

Вишокот килограми значително го оптоваруваат долниот дел од грбот и предизвикуваат болка.

„Прекумерната тежина претставува дополнителен стрес за сите зглобови и ‘рбетот“, објаснува д-р Марфи.

Болката во грбот е водечка причина за боледување и сериозно влијае врз општото здравје. Секоја четврта личност која има болка во грбот, истовремено се жали и на слаба физичка кондиција.

2. Јакнете ги стомачните мускули

Кога стомачните мускули се посилни, ‘рбетот трпи помало оптоварување. Со тоа се подобрува флексибилноста, а во комбинација со здрава телесна тежина се спречува појава на болка во грбот.

„Во зависност од природата на болката, приспособете ја физичката активност. Слушајте го своето тело – вие најдобро го познавате. Но, доколку нема подобрување, а болката се влошува секој ден, задолжително консултирајте се со лекар“, советува д-р Марфи.

3. Бидете активни

Редовната физичка активност е темел на добро физичко и ментално здравје, потсетува докторката.

Според студија од 2024 година, учесниците кои по 5 дена неделно шетале по 30 минути, значително помалку се жалеле на болка во грбот.

Д-р Марфи нагласува дека мирувањето како метод за контрола на болката е голем мит.

„Ако болката е резултат на компресија на нерв, проблем со диск или дегенерација на зглобови, неактивноста може само да ја влоши состојбата, да ја ослаби кондицијата и да ја ограничи подвижноста“, објаснува таа.

Затоа препорачува физичката активност да се прилагоди на здравствената состојба, а не целосно да се избегнува. Најдобри се лесни вежби, прошетки и пливање. Треба да се избегнуваат движења кои многу го оптоваруваат ‘рбетот – како на пример виткање и кревање тешки предмети.

„Без разлика на степенот и причината за болката, одредена форма на физичка активност ќе помогне во побрзо санирање и подобра контрола на симптомите“, подвлекува д-р Марфи.

Не мора да бидеме „спортски тип“

Светската здравствена организација препорачува 150 минути умерена физичка активност неделно. Кај хронично болни лица, задолжително е претходно консултирање со лекар.

Советот е: ако долго време седите, секогаш кога можете – прошетајте. Користете скали, пешачете на кратки релации наместо секогаш да се возите со автомобил. Не мора да бидете спортист – доволни се 30 минути дневна прошетка.

Стручњаците посочуваат и дека физичката активност е добар начин за справување со лошо расположение. Речиси три

четвртини од лицата со болки во грбот страдаат и од чувство на тага, безвредност или безнадежност.

Поверојатно е да развијат депресија и потешко се справуваат со секојдневниот стрес. Некои научници дури веруваат дека депресијата може дополнително да ја засили болката.

Затоа, покрај психотерапија и медикаменти, на пациентите им се препорачува и редовна физичка активност.