Холивудскиот актер Мел Гибсон, по неколкудневен престој, го напуштил Хиландар, каде што се запознал со православието и дознал сè за Косовската битка.
Веста дека Мел Гибсон решил да го помине големиот српски празник, Видовден, во манастирот Хиландар на Света Гора за неколку часа се прошири низ целиот свет, а набргу беше откриено зошто познатиот режисер и актер решил да го направи овој чекор.
По пристигнувањето на Света Гора, Гибсон се сретнал со игуменот на манастирот Хиландар, архимандритот Методиј, а на Фејсбук страницата на Хиландар беше откриено дека тој го напуштил ова светилиште.
Мел Гибсон у Хиландару на Видовдан
Прослављени глумац, режисер и продуцент Мел Гибсон је боравио у Светом манастиру...
Posted by Хиландар.орг - Hilandar.org on Sunday, June 29, 2025
„Познатиот актер, режисер и продуцент Мел Гибсон престојуваше во Светата царска лавра Хиландар од 27 до 29 јуни. За време на неговата посета, тој присуствуваше на прославата на ктиторската слава на Хиландар, празникот на Светиот великомаченик кнез Лазар – Видовден“, стои во објавата на манастирот.
„Тој беше во Хиландар поради длабоко духовни причини. Вистински посветен на темелите на христијанската вера, преку својот живот и богато филмско творештво, го посети ова монашко семејство заради молитвен мир и запознавање со православната традиција, која континуирано се наследува повеќе од осум века“, додадоа од манастирот.
Учествувал на литургијата, јадел со монасите и разговарал со нив. Игуменот Методиј го запознал со светите места, историјата на Хиландар и монашкиот живот во манастирот. Особено му ја објаснил важноста на Видовден, Косовскиот завет и жртвата што српскиот народ, во борбата за слобода и одбрана на христијанството, ја дал заради Царството Небесно.
Исто така во објавата на манастирот стои дека Гибсон таму барал духовна инспирација пред почетокот на снимањето на филмот „Воскресение“, чие снимање е закажано за септември.
Неговиот познат филм „Страдањата Христови“, кој ги прикажува настаните од животот на Исус Христос што му претходеле на распнувањето, остави длабок одек низ целиот христијански свет и пошироко, а филмот „Воскресение“ ќе ги следи настаните што се случиле откако Синот Божји воскреснал од мртвите.
