Дон Петит е најстариот астронаут кој го прослави својот 70-ти роденден во вселената, а по враќањето на Земјата – многумина беа загрижени поради неговиот изглед.
Додека повеќето луѓе на 70 години се приспособуваат на живот во пензија, астронаутот на НАСА, Дон Петит, имаше сосема поинакви планови. Тој се врати од повеќемесечен престој на Меѓународната вселенска станица, со што стана најстариот активен астронаут кој успешно завршил толку предизвикувачка мисија.
Астронаутот Дон Петит, заедно со двајца руски космонаути, се врати на Земјата , по седуммесечна мисија на Меѓународната вселенска станица. Тројцата ја напуштија станицата на 20 април, а безбедно слетаа југоисточно од Џезказган, Казахстан.
Во текот на својата 220-дневна мисија, ја обиколија Земјата 3.520 пати и поминаа над 150 милиони километри. Екипажот беше лансиран и приклучен на станицата на 11 септември 2024 година.
Дон Петит го прослави својот 70-ти роденден токму на орбитата, со што вкупно има поминато над 370 дена во вселената низ три различни мисии. Тој останува еден од најискусните астронаути на НАСА, а неговото активно учество во оваа мисија ја нагласува важната улога што и постарите астронаути можат да ја имаат во тешки и предизвикувачки средини – поставувајќи нов стандард за возраста во човековите вселенски мисии.
По неговото враќање, неколку загрижени обожаватели на вселенските мисии се огласија на социјалната мрежа X, коментирајќи го неговиот изглед.
„Доста сум загрижен за Дон. Не сум сигурен, но ми се чини дека се онесвести додека го носеа“, напиша еден корисник.
Друг додаде: „Се надевам дека Дон Петит е добро. Не изгледаше баш најдобро кога го извадија од капсулата. Денес му е 70-ти роденден – вистински ветеран астронаут.“
Сепак, НАСА тврди дека господинот Петит „се чувствува добро и е во рамките на очекуваното по враќањето на Земјата“.
„Според официјални претставници на НАСА на местото на слетување, тој се чувствува добро и закрепнува во согласност со стандардната процедура“, објави НАСА на Твитер.
