Нападот се случил меѓу селата Чатагил и Алањурт, во округот Ишчехисар, на место кое со векови било познато како светилиште на Фригите, користено за ритуали и принесување жртви.

Ахмет Левент Зејбек, археолог и поранешен директор за култура и општествени прашања во општина Ишчехисар, го опиша локалитетот како уникатно, повеќекатно светилиште врежано во карпа, кое било користено за време на фригискиот период.

„Не постои ниту еден друг ваков комплекс во светот“, изјави тој за весникот "Хуријет" и додаде:

„Фотографиите од претходно и по уништувањето ги откриваат размерите на катастрофата. Ова е трагедија и за Турција и за светската археологија“.

Злосторство против историјата

Зејбек објасни дека комплексот бил користен за религиски церемонии и жртвувања, и преживеал илјадници години – сè до сега.

„Ловци на богатство ја уништија структурата стара 3.000 години со динамит, барајќи злато“, рече тој.

„Од кој било агол да се гледа, ова е ужасно. Можеби нема да успееме да ја спасиме веќе уништената структура, но останатото културно наследство мора веднаш да се заштити и документира.“

„Плачев кога го видов тоа“

Познатиот археолог проф. Хава Ишкан Ишик остро го осуди уништувањето во емотивно интервју за "Хуријет".

„Не можев да ги задржам солзите кога ги видов фотографиите. Орнас карпите беа едно од највредните подрачја на Фригија“, изјави таа и додаде:

„Ова беше област за живеење, која носеше видливи траги од фригиската култура. Она што се случи овде не е само уништување — тоа е културно убиство.

Мора веднаш да се преземат чекори за да се заштити тоа што остана.“