[ВИДЕО] Концерт во чест на починатиот тапанар на ДНК и емотивен говор на неговата мајка: „Твојот мирис остана, тивко нѐ потсеќа на љубовта што ја имаше спрема секој човек“

На плоштадот присуствувале стотици луѓе кои од срце сакале да му оддадат почит на младото момче кое го загуби животот таа кобна ноќ, а вечерта била исполнета со солзи и емоции кои луѓето не можеле да ги сопрат.

Една од песните која била изведена и која привлекла најголемо внимание и разбудила емоции кај публиката е хитот на ДНК „Ако утре ме нема“, а меѓу присутните било и семејството на Ѓорѓи.

Мајката на Ѓорѓи, Зорица, напишала и говор за нејзиниот покоен син којшто бил прочитан на сцената.

Говорот ви го пренесуваме во продолжение:

„Како доказ дека љубовта и спомените никогаш не завршуваат.

Џоко беше една сјајна ѕвезда, што дури и зборовите за опишување беа малку. Во тебе имаше една музичка искра што успеа да постигнеш многу висок успех. Со тоа, нè направи нас горди родители, да бидеме горди на тебе.

Човек како човек ја сака најубавата ружа што ќе ја види, ете затоа ти беше една од најубавите ружи што прерано нè напушти. Но, твоето присуство сè уште се чувствува меѓу нас. На таа ружа корените никогаш нема да се откинат. Уште чувствуваме како растеш. Твојот мирис остана, тивко нè потсеќа на љубовта што ја имаше спрема секој еден човек. Само што не знаев дека мирисот може да донесе болка. Се чувствува толку силно и боли уште посилно, но твојот лик и твојата душа денес пак ги сплотија душите на многу луѓе, пак си ти причината да се обединиме и пак силно се чувствува твојата енергија на тапанот, која е шепот по сите улици, беше и ќе остане. Отсекогаш беше сакан помеѓу луѓето и засекогаш ќе останеш во нашите срца. Те сакаме бато Џоче“.