Поранешната советничка на Белата куќа за Русија, Фиона Хил, откри нови и досега непознати детали за односите меѓу американскиот претседател Доналд Трамп и рускиот претседател Владимир Путин.
„Не се работи повеќе за руски тенк што влегува на британска територија или за нуклеарна бомба што брише некој град од картата. Денес заканите се во форма на саботажи на клучна инфраструктура, труења, атентати“, изјави Хил, нагласувајќи дека верува оти Третата светска војна веќе е започната.
„Светските војни започнуваат кога низа глобални конфликти почнуваат да се испреплетуваат. Токму таму се наоѓаме сега“, изјави таа за британскиот „Telegraph“.
Можеби било случајност, но Владимир Путин за првпат ја претстави руската хиперсонична ракета преку симулација во која проектил погодува непознат полуостров што неодоливо потсетува на Флорида.
Тој детаљ не му избега на Доналд Трамп, чиј лик, според сведоците, избледел додека го гледал видеото – веројатно замислувајќи го својот омилен одмор во Мар-а-Лаго како исчезнува во атомски облак. До него, тој ден во март 2018 година, стоеше Фиона Хил, тогашна советничка за Русија.
„Го погоди тоа. Трамп рече: ’Зошто го направи тоа? Вистински држави не прават такви работи.‘ Тој е уплашен од Путин, го видов тоа од прва рака“, изјави Хил.
Хил, долгогодишна аналитичарка за Кремљ, која еднаш вечерала толку блиску до Путин што го почувствувала мирисот на детергентот од неговата облека, вели дека оваа епизода многу открила за ставот на Трамп кон рускиот претседател. „Покажува колку е подложен на Путин, бидејќи искрено го плаши можноста за нуклеарен судир“, вели таа.
За разлика од Трамп, кого го опишува како личност со менталитет од 1980-тите – и во надворешната политика и во музичкиот вкус, Хил тврди дека денешните закани доаѓаат од прикриени форми на војување.
По години предупредувања за руската закана, Хил во 2019 година се најде во центарот на вниманието, сведочејќи за време на првиот процес за импичмент на Трамп. Нејзиното сведочење откри ранливост на Белата куќа на руски влијанија, што предизвика лавина реакции – од пофалби до закани со смрт.
Таа подоцна ги објави своите мемоари со наслов „There is Nothing Here for You“, стана канцеларка на Универзитетот во Дурам, а минатата година беше именувана од Кир Стармер да го води британскиот Стратешки одбранбен преглед.
