Патниците што летаат за Турција кои ќе ги откопчаат безбедносните појаси и ќе станат пред авионот целосно да застане по слетувањето, може да бидат казнети со 60 евра според новата регулатива на Турската управа за цивилно воздухопловство (SHGM).
Ова претходно беше правило во сите авиокомпании, но во пракса се покажа дека често не се почитува.
„SHGM“ откри дека голем број патници ги откопчуваат безбедносните појаси, стануваат и ги отвораат кабините за багаж пред авионот да застане. Беше наведено дека ова однесување ја загрозува безбедноста на летот и удобноста на другите патници.
Новата регулатива, исто така, им наметнува одговорност на авиокомпаниите дека треба да ги предупредат патниците дека е задолжително да ги врзуваат безбедносните појаси сè додека е вклучено светлото за сигнализација - по слетувањето на авионот и додека авионот не стигне до позицијата за паркирање, и дека патниците кои не го почитуваат ова правило ќе бидат пријавени и казнети, пренесува „Hürriyet“.
Патниците кои нема да го чекаат својот ред при слегување може да се соочат и со казни, бидејќи новата регулатива им забранува на патниците да брзаат во ходникот и да се движат напред, дури и ако знакот за сигурносен појас е исклучен. Исто така, против правилата е да се стане пред патниците во првите редови да го напуштат авионот.
Авиокомпаниите кои не ги почитуваат новите правила може да бидат повикани на административна одговорност, објавува „Hürriyet“.
Најавено е дека Turkish Airlines испратиле и официјално известување до кабинскиот персонал за новата одлука, која ќе важи за сите „домашни и меѓународни летови“.
Иако износот на казната не е директно наведен во одлуката, се предвидува дека патниците кои ги прекршуваат прописите ќе бидат казнети со приближно 2.100 турски лири (околу 60 евра).
