„Копјаниците“ си пукаа во колено: „Сигурниот“ шампион Ајакс може да остане без титула поради примен гол во 99. минута!

„Копјаниците“ влегоа во страшна криза во критичен дел од сезоната и немаат победа на последните четири меча, а на вчерашниот натпревар против Гронинген си „пукаа во колено“ со играч повеќе во 99-та минута.

Ајакс водеше со 0:1 и 1:2 и имаше човек повеќе на теренот поради црвен картон на домаќините, но Гронинген и во таква ситуација израмни на 2:2 во 99-та минута и му зададе тежок удар на гостинот.

Великанот од Амстердам испушти десет бода во последните четири кола, па сега во пресрет на завршната рунда во Ередивизијата ПСВ е тој кој има се во свои раце.

Тимот од Ајндховен е во серија од шест победи во низа и последната ја оствари над Херкулес со 4:1, па сега има еден бод предност пред завршната рунда во Холандија.

ПСВ во последното коло игра против Спарта Ротердам на гостински терен, додека Ајакс дома го пречекува Твенте.