Доналд Трамп го обвини Харвард и други високообразовни институции дека дозволуваат антисемитизмот да процвета во нивните кампуси, при што неговата администрација побара да се преземат конкретни мерки – вклучително и анкети за ставовите на студентите и факултетите – со закана дека федералната влада ќе го укине нивното финансирање доколку не постапат така.
Администрацијата на Трамп вчера се закани дека ќе му го забрани на Универзитетот Харвард правото на прием на странски студенти доколку не се усогласи со барањата за транспарентност во процесите на прием, вработување и политичка ориентација.
„Ако Харвард не може да покаже дека е во целосна согласност со утврдените обврски, ќе ја изгуби привилегијата да запишува меѓународни студенти“, се наведува во соопштението на американското Министерство за домашна безбедност.
Министерството за образование веќе претходно замрзна 2,2 милијарди долари повеќегодишни федерални субвенции за оваа институција, откако таа одби да ги исполни барањата на Белата куќа.
На Харвард дополнително му се заканува укинување на фискалните стимулации. На почетокот на април, владата на САД упати неколку барања до раководството на универзитетот – укинување на политиките насочени кон промовирање на различноста и ревизија на програмите што, според администрацијата, „го поттикнуваат антисемитското вознемирување“, пренесуваат американските медиуми.
Трамп повторно ги засили критиките кон Харвард, нарекувајќи го „главна цел“ во битката против, како што вели, радикализацијата на академските институции, и се закани дека ќе му ги ускрати сите федерални субвенции и правото на прием на странски студенти.
На својата социјална мрежа Truth Social, Трамп изјави дека Харвард „учи омраза и глупост“ и дека „повеќе не треба да добива федерално финансирање“. Според извештаите на CNN и The Washington Post, Трамп и официјално поднел барање до даночните власти за укинување на даночните олеснувања на Харвард.
Во понеделникот, раководството на универзитетот отворено ги отфрли барањата на администрацијата, истакнувајќи дека тие веќе спроведуваат мерки против антисемитизмот повеќе од една година. Универзитетот додаде дека нема да се откаже од својата „независност, ниту од уставните права“ – особено од правото на слобода на изразување, загарантирано со Првиот амандман. Како одговор, 2,2 милијарди долари федерални средства беа замрзнати.
„Харвард повеќе не може да се смета за место за пристојно учење и не треба да биде на ниту една листа на големи светски универзитети“, изјави Трамп. Тој ја нарече институцијата „легло на радикални левичари, идиоти и мозоци на птици“.
Харвард, со седиште во Бостон, има околу 30.000 студенти и вкупно 162 добитници на Нобелова награда. Универзитетот се наоѓа на врвот на шангајската ранг-листа на светски универзитети. Меѓутоа, според Agence France-Presse, тој стана една од главните мети на конзервативците во нивната офанзива против, како што велат, левичарски настроените универзитети.
Нападите од страна на конзервативните кругови врз универзитетите ескалираа напролет 2024 година, за време на протестите на пропалестинските студенти против војната во Газа. Републиканците тогаш ги обвинија универзитетите дека не ги заштитуваат еврејските студенти. Неколку претседатели на престижни универзитети, вклучително и на Харвард и Колумбија, поднесоа оставки.
Универзитетот Колумбија, за разлика од Харвард, се согласи да воведе длабоки реформи – потег што некои го оценија како капитулација пред барањата на администрацијата на Трамп.
