Ерик Дејн, актерот кој се прослави со улогата на д-р Марк Слоан во серијата „Вовед во анатомија“ (Grey’s Anatomy), откри дека му е дијагностицирана Амиотрофична латерална склероза (АЛС) – тешко невролошко заболување кое со текот на времето доведува до губење на контрола врз мускулите, говорот и дишењето.
Во изјава за списанието „Пипл“ , Дејн истакна дека е благодарен за поддршката од семејството и изрази надеж дека наскоро ќе се врати на снимањето на серијата „Еуфорија“ (Euphoria), каде што ја толкува улогата на таткото на Нејт Џејкобс. Од неговиот тим засега нема дополнителни информации.
АЛС е неизлечива состојба, но новите терапии кои се тестираат даваат надеж за забавување на прогресијата и продолжување на животниот век.
АЛС е најчеста форма на болест на моторните неврони, која се влошува со текот на времето, влијаејќи на мускулната контрола, говорот, голтањето и дишењето. Раните симптоми вклучуваат слабост во рацете и нозете, често предизвикувајќи падови и губење на предмети од рацете. За жал, болеста нема лек, а терапии служат само за ублажување на симптомите. Оваа болест најчесто се дијагностицира кај постарите мажи (50-70 години), а просечниот животен век по дијагнозата е 3-5 години.
Актерската кариера на Дејн започна во 1990-тите со појавувања во серии како „Спасени од ѕвончето“ (Saved By the Bell) и „Брачни води“ (Married With Children). Пробивот го доживеа во 2006 година со улогата на згодниот пластичен хирург во „Вовед во анатомија“, која и денес се смета за една од најгледаните медицински драми на сите времиња. Во серијата, неговиот лик почина, а болницата беше преименувана во негова чест.
Во поново време, Дејн се појави во улоги поразлични од типичните шармантни заводници. Во „Еуфорија“ доби признанија за посложениот лик, а неодамна го гледавме и како платен убиец во акциониот филм „Лоши момци: Возете или умрете“ (Bad Boys: Ride or Die).
Во текст од „Њујорк тајмс“ од 2009 година, новинарката Лин Хиршберг го опиша како пример за „убавите луѓе на телевизијата“, а Џорџ Клуни тогаш за него изјави: „Тој не само што е згоден, туку има и смисла за хумор – а тоа е ретка комбинација“.
Дополнителна емоционална тежина носи фактот што сопругата на актерот, Ребека Гејхарт, неодамна го повлече барањето за развод, отворајќи ја можноста за помирување по повеќе од шест години откако првпат поднесоа барање за развод.
