Шкотската пејачка Сузан Бојл, која се прослави во 2009 година откако нејзината неверојатна аудиција на „Britain’s Got Talent“ го освои целиот свет, за прв пат по две години се врати на Инстаграм за да го прослави својот 64-ти роденден.
Животот на пејачката се сменил преку ноќ по емитувањето на нејзината аудиција од третата сезона на „Britain’s Got Talent“, а таа во 2019 година за „People“ изјавила дека „од малку непозната дама со мачка во Шкотска станала позната каде и да отиде“.
„Славата е толку бизарен концепт и никогаш не ми била мотиватор. Само сакам да пеам за на луѓето да им дадам радост и среќа, на кратко да заборават на реалноста и да се забавуваат“, додала таа.
Бојл го издала својот деби албум „I Dreamed a Dream“ во 2009 година, кој станал најпродаваниот албум во светот за таа година. Исто така таа објавила седум студиски албуми, а последниот во 2016 година, но издала и компилациски албум наречен „Ten“ во 2019 година.
Пред три години пејачката доживеала мозочен удар поради што имала проблеми со говорот и пеењето. Покрај тоа, таа се соочувала со голем број други здравствени проблеми. Имено пред 13 години ѝ бил дијагностициран Аспергеров синдром (невробиолошко развојно нарушување од групата на аутистични нарушувања и е поврзано со социјални тешкотии).
Бојл за прв пат прозборела за дијагнозата во интервју за Би-би-си во 2013, а истата година дознала дека боледува од дијабетес тип 1.
Неодамна по повод нејзиниот роденден, таа објави видео на Инстаграм во кое соопшти дека ѝ се враќа на музиката.
„Денес е посебен ден – роденден ми е! Но, имам нешто возбудливо да споделам … Се вратив и работам на некои прекрасни нови проекти кои едвај чекам да ги слушнете“, напишала пејачката.
