Официјални лица запознаени со подготовките за разговорите во Саудиска Арабија открија дека Киев ќе предложи делумен прекин на огнот со Русија, кој би вклучувал суспензија на нападите со беспилотни летала и ракети со долг дострел и борбени операции во Црното Море. Украинската влада се надева дека напредокот во преговорите може да го поттикне Вашингтон да ја повлече својата одлука за замрзнување на размената на разузнавачки информации и снабдувањето со оружје.

Еден украински функционер рече дека Киев краткорочно ќе даде приоритет на поправањето на односите со САД, додека двајца европски функционери истакнаа дека Украина гледа напредок во преговорите за прекин на огнот како услов за продолжување на воената и разузнавачката помош.

„Целта на какви било преговори меѓу украинските и американските власти во Саудиска Арабија ќе биде, меѓу другото, договор за продолжување на помошта“, изјави Федир Вениславски, пратеник од партијата на Зеленски и член на парламентарната комисија за национална безбедност, кон крајот на минатата недела. Американскиот државен секретар Марко Рубио до среда ќе престојува во саудискиот град Џеда, каде што ќе учествува во преговорите со цел „да се постигне напредок кон ставање крај на војната меѓу Русија и Украина“, изјави портпаролот на Стејт департментот.

Трамп вчера рече дека очекува „некои прилично добри резултати од Саудиска Арабија оваа недела“, додавајќи дека посакува Украина „да покаже дека сака мир бидејќи досега тоа не го покажала доволно“. На прашањето на новинарите дали ќе размисли за обнова на разузнавачката соработка, американскиот претседател одговори: „Токму тоа го правиме. Токму тоа го правиме“.

Зеленски го менува пристапот

Американскиот притисок врз Киев ја принуди администрацијата на Зеленски да го промени својот пристап по неуспешниот состанок во Белата куќа на 28 февруари.

„Тактиката се смени“, рече Володимир Фесенко, политички аналитичар во Киев. „Сега најважно е да се нормализираат односите со САД. Ако порано планот беше прво да се обезбедат безбедносни гаранции, а потоа да се бара прекин на огнот, сега е јасно дека тоа нема да се случи по тој редослед. Трамп тврди дека Украина не сака прекин на огнот, така што нашата цел е да им покажеме на САД дека сме подготвени да дејствуваат што е можно побрзо и да започнеме директни преговори со Русија“, додаде тој.

Во четвртокот, Зеленски им рече на лидерите на ЕУ во Брисел дека сака да склучи рамковен договор со Соединетите држави што ќе го отвори патот за понатамошни детални договори за минералните ресурси и безбедносните гаранции.

Поширок договор би започнал со прекин на воздушните напади, поморските операции и нападите врз енергетската и другата цивилна инфраструктура. Би продолжил со размена на затвореници и враќање на украинските деца киднапирани од руските власти, што треба да изгради меѓусебна доверба.

Украинскиот претседател денеска ќе отпатува за Саудиска Арабија за да се сретне со престолонаследникот Мохамед бин Салман, додека преговорите во Џеда ќе започнат следниот ден. Шефот на кабинетот на Зеленски, Андриј Јермак, ќе го предводи украинскиот преговарачки тим, а ќе учествуваат и министерот за надворешни работи Андриј Сибиха, министерот за одбрана Рустем Умеров и заменик-шефот на претседателскиот кабинет Павло Палиса.

Договорот за минерали нема да биде доволен?

Претседателката на Европската комисија Урсула фон дер Лајен рече дека Брисел и Киев „работат многу, многу блиску заедно“. Додека европските претставници тврдат дека околу 20 земји, предводени од Обединетото Кралство и Франција, изразиле подготвеност да формираат „коалиција на подготвени“ да ја поддржат Украина по евентуалниот прекин на огнот. Трамп досега се воздржуваше да вети американска поддршка за таква иницијатива.

Американскиот претседател беше бесен минатата недела кога неговиот украински колега сугерирал дека договорот за завршување на војната е сè уште далеку. „Ако некој не сака да склучи договор, нема да опстане долго“, рече Трамп потоа.

Сепак, Киев не се откажа од американското учество во спроведувањето на евентуалниот прекин на огнот, според тврдењата на европските претставници кои разговараа со украинските колеги пред преговорите. Тие наведоа дека ова може да вклучува, но не мора да биде ограничено на, употреба на американски сателити или разузнавачки сигнали за следење на прекинот на огнот.

Ен-Би-Си Њуз објави дека американските функционери веруваат дека договорот за минерали нема да биде доволен за Трамп да ја обнови помошта и разузнавачката соработка. Според нив, Трамп сака да види промена во ставот на украинскиот претседател Володимир Зеленски кон мировните преговори, вклучително и подготвеноста да направи отстапки како што е предавањето на териториите на Русија. Трамп дополнително сака Зеленски да направи одреден напредок кон одржување избори во Украина и евентуално да се повлече од лидерската позиција, рекоа официјалните лица.

Портпаролката на руското Министерство за надворешни работи, Марија Захарова, минатата недела изјави дека „секакво одложување е апсолутно неприфатливо“ без „конечно решение“.