Официјален претставник на Белата куќа рече дека објавата на Трамп во која тој жестоко го критикуваше Володимир Зеленски, е директен одговор на изјавата на украинскиот претседател кој претходно рече дека Трамп живее во „простор на дезинформации“.
Трамп потоа го нарече Зеленски диктатор и му порача дека лошо ја завршил работата. Во објавата на Трамп се додава и дека е подобро Зеленски да побрза или ќе нема земја со која ќе може да претседава.
На изјавата на Зеленски дека Трамп живее во простор на дезинформации создаден од Русија, се осврна и американскиот потпретседател Џеј-Ди Венс.
„Идејата дека Зеленски ќе го предомисли претседателот со лоши критики во јавноста е ужасен начин да се справите со оваа администрација, секој што го познава претседателот ќе ви каже дека тоа“, изјави Венс за „Дејли Мејл“.
„Очигледно го сакаме украинскиот народ“, рече Венс, додавајќи: „Се восхитуваме на храброста на војниците, но очигледно мислиме дека војната треба брзо да заврши“.
„Тоа е политика на претседателот на Соединетите Американски Држави. Таа не се заснова на руски дезинформации. Таа се заснова на фактот дека Доналд Трамп знае многу за геополитиката, има многу силни мислења и ги има тие мислења многу долго време“.
Венс додаде дека верува оти Зеленски добива многу лоши совети за тоа како да се справи со администрацијата на Трамп.
