Двајца членови на екипажот се пренесени во болница, а нивната состојба е стабилна.
Објавена е снимка која го прикажува падот на американскиот морнарички авион "EA-18G Growler" во водите кај Сан Диего во средата. Двајцата членови на екипажот успеале да се катапултираат пред авионот да се урне. Властите соопштија дека тие веднаш биле спасени од бродот "Premier" за спортски риболов, по што биле префрлени на блиско патролно пловило на царинската и граничната служба. Несреќата се случила за време на таканаречениот „маневар на заобиколување“, во кој авионот слетува и веднаш повторно полетува, изјави портпаролката на морнарицата, Бет Тич. Причината за несреќата сè уште се истражува.
Камерата која го снима сообраќајот во пристаништето на Сан Диего го забележала моментот на падот, а може да се слушне и како некој од екипажот на "Premier" се јавува на крајбрежната стража дека пилотите се катапултирале веднаш по полетувањето. „На пат сме да помогнеме. Во вода се!“, се слуша во повикот околу 10:14 часот по локално време. Неколку моменти подоцна, од бродот јавиле: „Ги извлековме пилотите, безбедни се“, пренесува "AP News".
Insane Footage from another CCTV Camera facing San Diego Bay, showing a U.S. Navy EA-18G “Growler” Electronic-Warfare Aircraft slamming into the Water earlier today near Naval Air Station North Island, following the ejection of both Aviators. pic.twitter.com/HKIjBZLio2
— OSINTdefender (@sentdefender) February 13, 2025
Брендон Виетс, капетанот на "Premier", изјавил дека во моментот на несреќата превезувал десетина патници на риболов крај Поинт Лома, кога слушнал звук на млазен авион кој му се чинел погласен од вообичаено. Се свртел и забележал две лица како паѓаат со падобрани. Веднаш запловил кон нив. Авионот останал во воздухот уште неколку минути пред да се нурне во водата, додал Виетс.
Спасените пилоти биле префрлени во болница, а нивната состојба е стабилна, потврдија властите. Крајбрежната стража распореди две пловила за да ги обезбедат остатоците на „Growler“ во пристаништето на Сан Диего. Овој млазен авион со две седишта се користи од страна на американската морнарица за електронско војување и поддршка на борбени мисии.
