Се покажа дека способноста да се балансира на едната нога кажува многу за севкупната кондиција и физичката отпорност на секој од нас.

Ако се прашувате зошто е важно стоењето на едната нога, одговорот е следниов – тоа е одличен начин да се спречат повредите, да се подобри држењето на телото и генерално да се олесни извршувањето на секојдневните задачи.

Затоа е многу важно да провериме колку долго можеме да стоиме на едната нога.

Зошто рамнотежата е клучен показател на кондицијата

Стоењето на едната нога или одржувањето рамнотежа е занемарена вежба, но всушност е многу моќна. Комбинира сила, флексибилност и невромускулна контрола – сè што е потребно за да останете стабилни на вашите нозе.

Кога стоите на едната нога, вашите мускули стабилизатори, оние во торзото, колковите и зглобовите, работат понапорно за да не паднете.

Oва не е важно само за спортистите. И кога одите по скалите или кога едноставно стоите во ред, рамнотежата го чува вашето тело.

Како што старееме рамнотежата станува поважна бидејќи спречува падови, а доколку ја тестирате, брзо и ефикасно ќе ја процените вашата севкупна физичка стабилност и контрола.

Колку долго треба да стоите на едната нога?

Колку долго можете да стоите на едната нога зависи од вашата возраст и кондиција.

„Eat This Not That“ објасни како да процените на која група ѝ припаѓате.

Почетно ниво: Ако можете да балансирате 15 – 20 секунди, тоа покажува добра стабилност и контрола, но може да биде и подобра.

Средно ниво: Држењето рамнотежа 30 – 40 секунди покажува силна стабилност на торзото и долниот дел од телото. Веројатно веќе имате цврста основа на сила и координација.

Напредно ниво: Во фантастична форма сте ако можете да балансирате на едната нога 60+ секунди без да се нишате. Ова ниво покажува одлична невромускулна контрола, сила и издржливост.

Како да се подобри рамнотежата

Ако сакате да ја подобрите вашата форма, еве неколку практични начини за подобрување на вашата рамнотежа.

Следете ја вашата состојба на неделно ниво за да видите како напредувате. Редовното тестирање ќе ви помогне да го согледате напредокот и ќе ви даде мотивација.

Зајакнете го вашето торзо бидејќи тоа е клучно за рамнотежа. Обидете се со практикување на „plank“ вежбата за да го зајакнете торзото.

Исто така, фокусирајте се на зајакнување на колковите, глутеусот и зглобовите, на пример, со практикување чучњеви.

Дополнително, истражувањето на познатата клиника Мејо вели дека колку долго некој може да стои на едната нога кажува повеќе за стареењето отколку промените во силата или одењето.

Добрата рамнотежа, мускулната сила и доброто одење значат независност и благосостојба во староста.

„Стоењето на едната нога е важно затоа што, покрај мускулната сила, го активира чувството за вид, чувството за рамнотежа и сложениот соматосензорен систем“, рече д-р Кентон Кауфман, автор на истражувањето и директор на лабораторијата за анализа на движење во клиниката Мејо.

Тој наведе дека „промените во рамнотежата заслужуваат внимание“.

„Ако имате лоша рамнотежа, ризикувате да паднете, без разлика дали се движите или не, а падовите се сериозен здравствен ризик со сериозни последици“ додаде тој.