Второто по големина ледено тело во светот, ледената плоча на Гренланд, се распаѓа побрзо од претходно, предупредуваат научниците. Користејќи тродимензионални мапи на површината, истражувачите откриле дека меѓу 2016 и 2021 година, пукнатините на плочата, на рабовите што се во движење, станале значително пошироки и подлабоки. Студијата, објавена во списанието "Nature Geoscience", ќе се користи за подобрување на моделите на идното однесување на ледената покривка на Гренланд.
Губењето на мразот на Гренланд доведе до пораст на нивото на морето за околу 14 милиметри од 1992 година, проценуваат научниците. Ако целата ледена покривка на Гренланд се стопи, нивото на морето би можело да се зголеми за седум метри, според научниците. Водечкиот автор на студијата, Др. Том Чадли, од Катедрата за географија на Универзитетот во Дурам, рече дека во светот што се загрева може да очекуваме да се формираат повеќе пукнатини.
Географ: За прв пат можеме да видиме што точно се случува
„Ова е затоа што глечерите се забрзуваат како одговор на потоплите температури на океаните, и затоа што пукнатините, исполнети со стопена вода, потоа можат да предизвикаат повеќе пукнатини подлабоко во мразот. Сепак, досега немавме податоци за да покажеме каде и колку брзо се случува ова на целата ледената плоча на Гренланд.
За прв пат, можеме да видиме значителни зголемувања во големината и длабочината на пукнатините во брзодвижечките глечери на рабовите на Ледената покривка на Гренланд, во временска рамка од пет или помалку години.
„Со оваа база на податоци, можеме да видиме не само дека полињата со пукнатини се протегаат во ледената покривка, како што беше претходно забележано, туку дека во промените доминираат постоечките полиња со пукнатини кои стануваат се поголеми и подлабоки“, објасни Чадли.
