Камионите за прва помош денеска пристигнаа во Појасот Газа, по стапувањето во сила на договорот за прекин на огнот меѓу Израел и Хамас, соопштија локалните безбедносни сили.
Светската програма за храна на ОН објави дека помошта пристигнала во Појасот Газа преку преминот Керем Шалом на југ и Зиким на север. Според арапските медиуми, речиси 200 камиони се на пат кон палестинска територија.
Хуманитарната ситуација во Газа веќе беше лоша пред почетокот на војната во октомври 2023 година, по нападот на Хамас врз Израел. Оттогаш драстично се влоши.
Според ОН, повеќе од 90 отсто од приближно 2 милиони жители на Појасот Газа се соочуваат со силен глад. Покрај тоа, недостигаат и вода за пиење, засолништа и лекови.
Агенцијата на Обединетите нации за помош и работа за палестинските бегалци (УНРВА) подготви 4.000 камиони со помош за Појасот Газа. Половина се полни со храна и брашно.
Договорот за прекин на огнот меѓу Израел и Хамас во Газа денес стапи во сила.
