Студиото „Bleecker Street“ го објави официјалниот трејлер за „Love Me“, романтичен филм со Кристен Стјуарт и Стивен Јеун.
Дејството во „Love Me“ е сместено во свет каде што човештвото повеќе не постои и ја прикажува врската помеѓу пловката Деа и сателитот Лиам, кои се среќаваат во дигиталниот свет и подоцна се заљубуваат.
Заедно, Деа и Лиам градат дигитален свет во кој прво постојат во дводимензионална форма, додека не успеат повторно да ја создадат среќната двојка што некогаш живеела на Земјата.
„Love Me“ е режисерското деби на брачниот пар Сем и Енди Зучеро, кои го напишаа и сценариото за филмот.
Во интервју за списанието „People“, парот откри дека нивната инспирација за филмот била идејата дека вештачката интелигенција ќе ја наследи планетата откако луѓето ќе се уништат едни со други. Но, во суштина тоа е „љубовна приказна за човештвото“.
„Тоа е приказна за тоа колку далеку се чувствуваме еден од друг во моментов и колку сме очајни за некаква врска. „Love Me“ стана огледало за тоа кои се преправаме дека сме и кои сме навистина“, велат Сем и Енди Зучеро.
„Love Me“ беше премиерно прикажан на филмскиот фестивал Санденс во јануари 2024 година, каде што наиде на различни реакции од критичарите - филмот има само 47% на „Rotten Tomatoes“. Филмот ќе започне да се прикажува во кината на 31 јануари оваа година.
