Претседателката на Европската централна банка (ЕЦБ), Кристин Лагард, изјави дека еврозоната е „блиску“ до исполнување на среднорочната цел за инфлација.
Таа нагласи дека, доколку трендот на намалување на инфлацијата продолжи, централната банка дополнително ќе ги намали каматните стапки. Целта е инфлацијата да се одржи на ниво од 2%, при што не е потребно дополнително ограничување на економскиот раст.
„Многу сме блиску до фазата во која можеме да кажеме дека одржливо ја доведовме инфлацијата на среднорочните 2%“, изјави Лагард. Сепак, таа повика на претпазливост, особено поради инфлацијата во секторот услуги, која останува повисока, на 3,9%.
Лагард исто така ја истакна својата загриженост за потенцијалните трговски конфликти, истакнувајќи дека одмаздата на европските земји на заканите за царини од новиот американски претседател Доналд Трамп би била штетна за глобалната економија.
„Одмаздата е лош пристап. Трговските ограничувања и одмаздничкиот пристап не носат ништо добро за глобалната економија,“ рече Лагард.
