Извори од украинската служба на Би-Би-Си, повикувајќи се на безбедносните и разузнавачките агенции во Киев, потврдија дека нивните оперативци спроведуваат мисии насочени кон руски воени и владини лица кои учествуваат во војната – без оглед на тоа каде се наоѓаат тие „украински непријатели“.

Ова ги вклучува окупираните украински територии, самата Русија, па дури и странски локации.

Атентатот врз рускиот генерал-полковник Игор Кирилов, извршен со експлозивен уред за кој се верува дека бил скриен во скутер, е опишан како исклучително смел потег. Воениот експерт Иван Ступак, поранешен офицер на украинската безбедносна служба (СБУ), го споредува со нападот на Мосад врз Хезболах на почетокот од оваа година.

„Украинските тајни служби требаше да одлучат дали да пукаат во него, да го разнесат или да го отрујат“, изјави тој.

Украинските власти сè уште официјално не го коментирале настанот.

Листа на цели

Ступак изјави дека СБУ го смета за легитимна цел секој што подготвува, планира, поддржува или извршува руска агресија против Украина.

Списокот на цели објавен од украинската разузнавачка служба ХУР вклучува руски генерали и команданти на други сили, како што се руските воздухопловни сили кои вршат напади врз украинските градови и енергетската мрежа.

Сепак, кога тајната служба одлучува кого ќе таргетира, внимателно ги разгледува факторите како достапноста и важноста на секоја личност.

„Оваа операција беше изведена исклучително професионално. За да се спроведе ваква операција, е потребна група искусни луѓе“, изјави тој за Би-Би-Си.

„Тие мораа да откријат дали генералот е вооружен, кој се наоѓа во неговата придружба и дали е под заштита на руската безбедносна служба.

Оперативците требаше да ризикуваат да бидат фатени со експлозив на улиците на Москва или да бидат забележани од безбедносните камери – покрај тоа што требаше да обезбедат безбедна и брза стратегија за извлекување.

„Еден разузнавач, задолжен за слични операции, еднаш ми рече дека кога испраќа луѓе на такви задачи, секоја минута се чувствува како три дена“, додава Ступак.

Разузнавачка работа и дезинформации

Генерал-полковник Игор Кирилов, шеф на руската одбрана од хемиско оружје, беше особено истакната мета на украинската тајна служба.

Во понеделникот, СБУ го осуди Кирилов (54) во отсуство, наведувајќи дека тој е „одговорен за масовна употреба на забрането хемиско оружје“.

Безбедносната служба тврдеше дека, под водство на овој генерал, Русија употребила хемиско оружје повеќе од 48.000 пати.

Во октомври, Обединетото Кралство го стави Кирилов на списокот со санкции, наведувајќи дека тој е одговорен за употреба на хемиско оружје во Украина и дека служел како „истакнат портпарол за дезинформации од Кремљ“.

Москва ги негира обвинувањата.

Кирилов, исто така, организираше една од најозлогласените кампањи за дезинформации против Украина од почетокот на конфликтот.