"Alphabet", матичната компанија на "Google", и "Apple", добија предупредување од двајца американски законодавци дека мора да го отстранат "TikTok" од нивните продавници за апликации во САД до 19 јануари. Предупредувањето дојде во писмо до извршните директори на овие компании, потпишано од републиканец конгресменот Џон Муленар, претседател на Комитетот на Претставничкиот дом за Кина и демократскиот конгресмен Раџа Кришнамурти.
Овој потег доаѓа откако американскиот федерален апелационен суд пресуди дека кинеската компанија "ByteDance", сопственик на "TikTok", мора да ја продаде апликацијата во САД или ќе се соочи со забрана. "TikTok" моментално го користат околу 170 милиони Американци.
Законодавците, освен што ги повикаа "Apple" и "Google" да преземат акција, го повикаа и извршниот директор на "TikTok", Шо Зи Чу, да ја продаде апликацијата. Во писмото тие истакнаа: „Конгресот дејствуваше решително за да ја заштити националната безбедност на Соединетите Држави и корисниците на "TikTok" во Америка од Кинеската комунистичка партија. Го повикуваме "TikTok" веднаш да ја спроведе квалификациската продажба“.
Американското Министерство за правда соопшти дека забраната, доколку стапи на сила на 19 јануари, нема веднаш да ги спречи корисниците кои веќе ја имаат апликацијата да продолжат да ја користат, но суспензијата на техничката поддршка на крајот ќе ја направи апликацијата неупотреблива. "TikTok" во четвртокот предупреди дека тоа ќе значи отстранување на апликацијата од мобилните продавници за половина Американци кои сè уште не ја преземале, сериозно ограничувајќи ја нејзината функционалност.
"ByteDance" и "TikTok" поднесоа итна петиција до Врховниот суд на САД за привремено блокирање на одлуката во очекување на судска ревизија.
Републиканскиот сенатор Џош Хејли изрази надеж дека "ByteDance" ќе го продаде "TikTok", нагласувајќи дека законот јасно ја дефинира забраната поради надзорот на апликацијата од страна на Пекинг, што е клучно прашање за националната безбедност на САД, пренесува "CNN".
