Во еден од текстовите, Тесла проговорил за своето детство, трагичната загуба на својот брат и патот до кариерата која го направила еден од најголемите умови во историјата.

Трагедијата што го промени неговото семејство

Тесла се осврнува на својот брат, кој го опишува како надарено дете со редок биолошки феномен. Тој загинал во трагичен инцидент предизвикан од семејниот коњ, што оставило длабоки рани кај целото семејство.

„Имав брат чија прерана смрт ги уништи моите родители. Коњот што го добивме како подарок беше умен и сакан од целото семејство. Но, тој беше одговорен за повредите на брат ми, од кои тој почина. Иако поминаа 56 години, се уште се сеќавам на таа трагична сцена како да беше вчера.“

Тесла признал дека по загубата на брат му, чувствувал како сите негови постигнувања само ги продлабочувале болката и разочарувањето на неговите родители.

Судирот на желбите

Никола од рана возраст имал желба да стане инженер, но неговиот татко, кој бил свештеник, го подготвувал за свештеничка кариера.

„Од раѓање ми беше предодредено да станам свештеник, што ме угнетуваше. Сакав да бидам инженер, но татко ми не ми дозволи. Тој беше образован човек и талентиран писател, познат по својот хумор и сатиричен стил.“

Неговиот татко бил инспиративна фигура, но неговото инсистирање Никола да го продолжи семејното наследство му создало внатрешен конфликт.

Раните искуства што го обликуваа

Тесла опишува анегдоти од детството кои ја одразуваат неговата интелигенција, но и неговата несигурност. Една од нив се однесува на средба со локален службеник кој го нарекол „премногу паметен“ за да добие сребрена паричка, што оставило силен впечаток на младиот Тесла.

Во текстот, тој исто така ја споменува својата непријатност во друштво, особено со две свои тетки, кои, и покрај нивната љубов кон него, предизвикувале страв кај младиот Тесла поради нивните „неатрактивни лица“.

Наследството на татко му

И покрај разликите, Тесла изразува длабока почит кон својот татко, кој бил познат по својата елоквентност, чувство за хумор и уметнички дух. Татко му често користел хумористични и практични совети, како оној што му го дал на еден работник:

„Не замавнувај кон она што го гледаш, туку кон она што сакаш да го удриш.“

Од генијално дете до пронаоѓач

Сите овие искуства – од семејната трагедија, конфликтите со татко му, до неговите рани експерименти – го обликувале Тесла како личност и пронаоѓач. Текстовите нудат уникатен поглед во човечката страна на научникот, откривајќи како животните околности влијаеле на неговите револуционерни идеи.