За евентуалното испраќање војници и гаранции за безбедноста на Украина, Макрон посочи дека тоа ќе биде суверена одлука на Франција.
Полскиот премиер Доналд Туск и францускиот претседател Емануел Макрон денеска во Варшава ги отфрлија шпекулациите дека ќе испратат свои војници во Украина доколку се договори примирје или како гаранција за безбедноста на земјата од руските напади.
„Веднаш ќе ги прекинам шпекулациите за испраќање војници на оваа или онаа земја во Украина. Одлуките ќе се носат исклучиво во Варшава. Нема да преземаме такви чекори“, рече Туск на заедничката прес-конференција со Макрон.
Туск изјави дека Варшава наместо тоа ќе соработува во изнаоѓање такви решенија и гаранции дека конфликтот во Украина нема да се повтори и додаде дека неговите разговори со лидерите на балтичките и скандинавските земји и Макрон покажале дека тие се „еден тим“ кога станува збор за безбедноста на Европа и напорите да се постигне „праведен мир“ за Украина.
„Имаме ист став дека Украина мора да биде присутна во сите дискусии и дека сите предлози мора да бидат прифатени од нашите пријатели во Киев“, рече Туск.
За евентуалното испраќање војници и гаранции за безбедноста на Украина, Макрон посочи и дека тоа ќе биде суверена одлука на Франција.
„Никој друг нема да одлучи што ќе прави Франција. Ние сме суверена земја. САД ќе играат нова улога во наредните месеци. Администрацијата на Трамп би сакала да влијае на текот на конфликтот. Треба да најдеме решение што ќе да ги земе предвид интересите на Украина, но и безбедноста на Европа“, рече Макрон.
Францускиот претседател рече дека одржливиот мир е само траен мир, оној кој обезбедува трајни гаранции за безбедност и дека за тоа мора да преговараат Украинците.
„Ние велиме дека нема мир во Украина без Украинците, тие мора да преговараат. Меѓутоа, во Европа нема безбедност без Европејци. Трајно безбедна Украина значи трајно безбедна Европа“, рече Макрон.
Макрон во Варшава ќе разговара и со полскиот претседател Анджеј Дуда.
