Експлозии по нападите со украински дронови врз базата Дијагилев во руската област Рјазан и пристаништето Новоросијск
Украински дронови извршија напад врз руска воздушна база во близина на градот Рјазан и врз пристаништето Новоросијск.
Според Укринформ, информацијата првично била објавена на каналот Астра на Телеграм, кој се повикува на сведоштва од локалните жители. Објавена е и снимка од експлозијата предизвикана од ударот на дронот.
Павел Малков, гувернерот на руската област Рјазан, се огласил по нападот.
Силите за противвоздушна одбрана соборија три беспилотни летала над регионот Рјазан - изјави Малков, додавајќи дека нема жртви или материјална штета.
Утрово, руското Министерство за одбрана соопшти дека во текот на ноќта биле пресретнати 24 дронови над шест различни региони, од кои три над регионот Рјазан.
На социјалните мрежи се појавија тврдења дека цел на нападот во тој регион била базата Дијагилев.
Според Укринформ, оваа база, која е лоцирана на 500 километри од фронтот, служи како домаќин на руските бомбардери Ту-22МС и авионите за полнење гориво Ил-76. Базата исто така се користи за дополнителна обука на пилоти на авијација со долг дострел.
Во непосредна близина на базата се наоѓа и објект за поправка на руски стратешки авиони, вклучувајќи бомбардери Ту-22М и Ту-95МС, како и транспортни авиони Ил-76.
Жителите на Новоросијск и неговите предградија изјавија дека во близина на пристаништето, на местото каде што се чуваат проектилите, се слушаат силни експлозии.
Андреј Кравченко, градоначалникот на Новоросијск, потврди дека силите за воздушна одбрана реагирале на нападот.
