Доминик Пелико, Французинот на кој му се суди дека ја дрогирал сопругата Жизел и поканил странци да ја силуваат, има поделена личност поради траума од детството, тврди неговата адвокатка.
Беатрис Заваро пред судот во Авињон изјави дека има „два Доминика“, едниот човек јасно посветен на своето семејство, а другиот со „извесна перверзност“.
Таа го цитираше и она што нејзиниот клиент наводно ѝ го рекол на сопругата: „Те изневерив... без тебе јас сум ништо. Суди ме според најдобрите моменти од нашите животи. Знам дека еден ден повторно ќе се сретнеме на друго место и се надевам дека ќе можеме повторно да зборуваме за сето ова“.
Заваро ја повика 72-годишната Жизел „да го има на ум овој прв Доминик... човекот што беше тој, кој длабоко ја сакаше“. Таа прочитала и песна што Доминик ѝ ја напишал на Жизел од затвор. Во тој момент Доминик ја наведна главата и ги избриша солзите, додека Жизел гледаше право пред себе.
Пресуди до 20 декември
Доминик беше уапсен во ноември 2020 година, откако беше фатен како снима жени под здолништата во супермаркет. Детективите потоа откриле 20.000 видеа и фотографии од злоставувањето на неговата сопруга на телефони, компјутери и хард дискови. На 53-тиот ден од судењето, Заваро рече дека се чувствува како да станала „застапник на ѓаволот“ преземајќи ја неговата одбрана.
Таа нагласи како го запознала во април 2021 година и дознала за неговото насилно детство.
„Тој бил сведок како татко му ја злоставувал мајка си додека рацете ѝ биле врзани зад грб. Ми кажа дека бил силуван во болница како деветгодишник и дека бил сведок на групно силување како 14-годишник“, забележа таа.
Доминик и Жизел имаат три деца: Дејвид, Каролин и Флоријан.
„Дејвид рече дека ништо не им недостасува. Каролин, и покрај нејзиниот разбирлив гнев, исто така објективно рече дека е грижлив, дарежлив човек. Тој беше многу заљубен во својата сопруга. Ми рече: ‘Јас бев ништо пред неа, јас бев нешто друго со неа, и сега се враќам на ништо’“, рече Заваро.
Во нејзиното резиме, кое вклучуваше цитати од Фројд, Џон Бетјеман и психологот Борис Кирилник, Заваро заклучи: „Можеби најголемиот непријател на Доминик Пелико е Доминик Пелико“. Адвокатите на одбраната ќе се обратат пред судот во следните три недели. Пресудите се очекуваат до 20 декември.
