Пред извесно време Брендан Фрејзер си ја отвори душата и го шокираше светот со интимна исповед, раскажувајќи меѓу другото како се изборил со депресијата, пропаднатиот брак и последиците од сексуалното злоставување кое го доживеал во 2003 година. Многумина не верувале во таа приказна затоа што имал 35 години и неколку значајни улоги во акциони филмови. Но, тој тврди дека тоа се случило.

Актерот јавно проговорил и детално опишал како бил малтретиран од тогашниот претседател на Холивудската асоцијација за странски медиуми, Филип Берк. Наводниот инцидент се случил во хотелот Беверли Хилс, каде што ручале.

„Ме фати за задникот и го турна прстот во мене. Се чувствував лошо, како да имам грутка во грлото. Мислев дека ќе заплачам.“

Единствено на сопругата ѝ раскажал што се случило. Тој молчел затоа што се плашел не само од јавен срам, туку и дека тоа може да влијае на неговата кариера. По некое време тој го пријавил инцидентот во Холивудската асоцијација за странски медиуми. Бурк рекол дека му напишал писмо на Фрејзер, но негирал дека сторил нешто лошо.

Актерот се обвинувал себеси за тоа што му се случило. Чувството на вина го довело во депресија, на која дополнително влијаеле и здравствени проблеми. Имено, бидејќи сакал да снима акциони сцени без помош на каскадери, често го повредувал ’рбетот и имал неколку операции на грбот и колената. Ги оперирал и гласните жици. Повеќе време поминувал во болници отколку во холивудски студија.

Бидејќи неволјата никогаш не доаѓа сама по себе, следел разводот од неговата колешка Афтон Смит, со која има три деца, ја загубил мајка си за која бил многу приврзан и не можел да се ослободи од траумата од хотелот. Депресијата, освен тешките мисли, донела и вишок килограми, па со години веќе не потсетувал на оној мускулест маж од џунглата по кој воздивнувал понежниот пол.

Брендан Фрејзер во немилост на Холивуд

Многумина веруваат дека искреноста му направила најголем проблем и му ја запрела кариерата. Така мисли и тој. Како некој да го ставил на црна листа, забранувајќи му пристап до филмските студија и сè што е поврзано со работата.

„Не знам дали моето признание предизвика немилост на Холивудската асоцијација за странски новинари. Но, тишината беше застрашувачка. Кога телефонот ќе престане да ѕвони, почнувате да се прашувате „зошто“. Постојат многу причини, а дали тоа беше една од нив? Мислам дека е така.“

Сепак, Брендан Фрејзер успеа да се избори со најтемниот период од својот живот. Мајсторската улога во драмата „The Whale“ и трансформацијата во маж тежок 270 килограми го вратија во центарот на вниманието, а тој повторно успеа да ја пронајде и љубовта.

Со шминкерката Џини Мур, познатиот актер последниве две години свечено продефилирува на црвениот тепих.