Објавени се номинациите за Греми наградите, а Бијонсе се наоѓа на врвот со вкупно 11 номинации, со што вкупната бројка на номинации во текот на нејзината кариера се искачи на 99, а Бијонсе стана пејачка со најголем број номинации во историјата на Греми наградите.
Нејзиниот албум „Cowboy Carter“ е номиниран за албум на годината, како и за кантри албум на годината, а нејзината песна „Texas Hold’Em“ номинирана е за музички запис, песна и кантри песна на годината. Таа, исто така се здоби со номинации во широк спектар на жанрови, вклучувајќи ги поп, кантри, американа и мелодичен рап.
Ова е првпат таа да биде номинирана во категориите кантри и американа. Претходно, Бијонсе и нејзиниот сопруг Џеј Зи беа изедначени во повеќето номинации во нивните кариери, со вкупно 88.
Доколку Бијонсе победи во трката за албум на годината, таа ќе стане првата Афроамериканка на која тоа ѝ успеало во 21 век. Лорин Хил беше последната Афроамериканка која победи во 1999 година со „The Miseducation of Lauryn Hill“, приклучувајќи им се на останатите Афроамериканки – Натали Кол и Витни Хјустон кои успеале да ја освојат главната Греми награда.
Пост Мелоун, исто така, ги доби своите први номинации во кантри категориите оваа година, откако во август го објави својот деби-кантри албум „F-1 Trillion“.
Мелоун се наоѓа веднаш зад Бијонсе, со седум номинации, изедначен со Били Ајлиш, Кендрик Ламар и Чарли XCX.
Од друга страна, Тејлор Свифт и за прв пат номинираната Сабрина Карпентер како и Чапел Роан заработија по шест номинации.
