Пратеничката група на ВМРО – ДПМНЕ и Коалицијата нема да го прифати законското решение поднесено од СДСМ бидејќи е несериозно и не решава ниту еден проблем, истакна Драгана Бојковска, пратеник на Пратеничката група на ВМРО-ДПМНЕ и коалицијата „Твоја Македонија“.
„Напишано брзоплето, без никаков аргумент и економска логика што впрочем можеше да се види и од излагањето на колешката Тренчевска.
Истите оние што ја разурнаа македонската економија и што животниот стандард на граѓаните го донесоа на дното сега со лажна грижа нудат решенија што не можат да го подобрат животот на луѓето.
Нов ден – ново економско промашување од партијата на богаташите од Дубаи.
Најверојатно на пауза во хотелот Хилтон во Дубаи ја добиле идејата за да поднесат законско решение кое што и самите четири пати го отфрлија во минатиот мандат“, посочи пратеничката на ВМРО-ДПМНЕ.
Само за потсетување, додаде таа, тогаш го покачија ДДВ-то на над 2.000 прехрамбени производи.
Според Бојковска, доколку СДСМ сака навистина да им помогнат на граѓаните единствено што во моментот треба да направат е да гласаат за Буџетот за 2025-та година.
„За повисоки плати на сите работници, за 5.000 денари повисоки пензии за сите пензионери, за реализација на 4 нови автопати, за повисок студентски оброк, за реконструкција на студентски домови, за Ваучер од 250 евра за секој студент, за рекордно висока сума на капиталните инвестиции“, дополни таа.
Појасни дека имаат конкретен план кој дава резултати.
