Генералниот секретар на ОН Антонио Гутереш присуствува на самитот на БРИКС во Русија.
Генералниот секретар на Обединетите нации Антонио Гутереш денеска пристигна во рускиот град Казан каде ќе присуствува на самитот на БРИКС.
„Moscow Times“ пишува дека ова е прва посета на Гутереш на Русија по повеќе од две години.
Русија е домаќин на тридневен самит во главниот град на републиката Татарстан, кој почна вчера, а Гутереш при слетувањето на аеродромот во Казан беше пречекан од претседателот на локалното собрание.
Се известува дека Министерството за надворешни работи на Украина остро ја осуди оваа посета на генералниот секретар на ОН на Русија, оценувајќи дека тој направил „погрешен избор кој не е во корист на мирот“.
Се потсетува дека Гутереш претходно ја одбил поканата од Киев да учествува на мировниот самит во Швајцарија, во чија организација учествувал и украинскиот претседател Володимир Зеленски.
Се наведува дека Обединетите нации сметаат дека БРИКС, деветчлена организација која покрај Русија ги вклучува, меѓу другите, Кина и Индија, е од „огромно значење“ со оглед на тоа што овој блок на земји претставува речиси половина од светското население.
„Се очекува Гутереш да одржи говор на самитот на БРИКС“, изјави вчера Фархан Хак, заменик портпарол на генералниот секретар на ОН.
Тој исто така изјави дека Гутереш утре планира да се сретне со рускиот претседател Владимир Путин и дека на таа средба првиот човек на меѓународната организација „ќе ги потврди своите добро познати позиции во однос на војната во Украина и условите за воспоставување праведен мир, врз основа на Повелбата на ОН“.
„Тој ќе продолжи да ги спроведува напорите за повторно воспоставување безбедна пловидба во Црното Море, што е од критично значење за глобалната безбедност на храната и енергијата, особено кога станува збор за најранливите земји ширум светот – рече Хак.
Тој додаде дека Гутереш ќе ја посети Украина „кога ќе им одговара на двете страни“.
Се потсетува дека името БРИКС е создадено од првите букви на имињата на англиски јазик на петте оригинални членки – Бразил, Русија, Индија, Кина и Јужна Африка.
Организацијата се прошири претходно оваа година со прием на Египет, Етиопија, Иран и Обединетите Арапски Емирати за членството.
