[ВИДЕО] Деби за паметење: Доби повик и се најде во стартната постава поради повреда на Мусиала, па постигна гол за победа

Начинот на кој се најде на овој национален собир го прави случајот на Левелинг уште поуникатен, но мора да се признае дека и самиот се избори да биде топ тема во Германија.

Офанзивниот фудбалер постигна гол уште во 2-та минута од натпреварот со Холандија, но истиот беше поништен поради офсајд, што значеше дека радоста за дебитантот траеше доста кратко.

Сепак, околностите се променија во 64-та минута на „Алијанц арена“, бидејќи Левелинг испорача „проектил“ во мрежата на Вербруген, по што веќе никој не можеше да му го одземе премиерниот гол.

На крајот, истиот се покажа како доволен за победа и важни три бода, кои дефинитивно имаат и уште поголемо значење поради приказната за Џејми.

Напаѓачот на Штутгарт беше дополнително повикан од Јулијан Нагелсман како замена за повредниот Џамал Мусиала, а денеска пред мечот беше вметнат во стартната постава како замена за повредениот Денис Ундав.

На крајот, испадна дека тој е вистинскиот „џокер“ на селекторот Нагелсман, па сосема заслужено е што доби и највисока оценка на оваа средба во Лигата на нации.