Папагали окупирале цел град и ги излудуваат жителите: „Многу се гласни и предизвикуваат прекини на струја“

Илјадници зелени, жолти и црвени птици го опседнуваат ова место, како резултат на сечењето на шумите во околните ридови, објаснуваат биолозите.

Но, проблемот не е во нивниот број (на секои 5.000 жители има по 10 папагали), туку во тоа што ги гризат каблите на електричната мрежа и предизвикуваат несреќи.

Покрај тоа, тие постојано испуштаат гласни звуци и зад себе оставаат куп измет, пренесува "The Guardian".

„Шумите полека исчезнуваат, па папагалите бараат храна и засолниште во градот, особено во текот на есента и зимата“, вели биологот Даина Лера.

Во текот на летото и сезоната на парење, жителите на градот Хиларио Аскасуби можат да здивнат додека птиците мигрираат на југ.

На социјалните мрежи се појавија бројни видеа од папагали кои ја опседнуваат електричната мрежа, зградите и локалната црква, а сцените потсетуваат на трилерот на Хичкок „Птици“ од 1963 година.

„Ги гризат каблите, а потоа врне дожд и се навлажнуваат. Тогаш е прекинато снабдувањето со електрична енергија. Папагалите секојдневно ни создаваат проблеми и трошоци“, изјавил новинарот Рамон Алварез.

Жителите на различни начини се обидувале да ги избркаат, но безуспешно.

„Важно е да се врати природната средина. Но, додека тоа не се случи, мораме да смислиме стратегија која ќе ни овозможи да живееме заедно на најхармоничен можен начин“, заклучи Даина Лера.