Британското воено разузнавање проценува дека Русија претрпела повеќе од 610.000 жртви (убиени и ранети), додека украинското Министерство за одбрана ја проценува оваа бројка на околу 635.000.

Руските тактики, вклучувајќи масивни бранови на пешадија и слаб квалитет на војниците, придонесуваат за такви големи жртви.

Украинските загуби беа исто така значајни, со некои проценки дека нивниот вкупен број изнесува околу 480.000 (80.000 загинати и 400.000 ранети).

За разлика од Русија, украинските сили имаат поголем сооднос меѓу ранети и убиени, а некои од нив може да се вратат на бојното поле, во зависност од тежината на нивните повреди.

Руски загуби

„Војната во Украина беше скап потфат за Русија, особено во однос на војниците. Од почетокот на конфликтот, Русија веројатно претрпе повеќе од 610.000 жртви (убиени и ранети)“, проценува британското воено разузнавање во најновата анализа на војната.

Украинското Министерство за одбрана проценува дека руските загуби се уште поголеми, на околу 635.000.

Една од главните причини за многу високите загуби на Кремљ е тактиката што ја користат руските команданти на бојното поле.

„Тактиката заснована на масовни бранови на пешадија бара од Русија континуирано да ги надополнува борбените единици со нови регрути“, додаде британското воено разузнавање.

Руските команданти се вратија на застарена тактика поради неколку причини. Прво, руската војска нема инфраструктура и софистицираност за поддршка на големи комбинирани операции и маневарско војување. Како резултат на тоа, руските команданти едноставно ги туркаат своите трупи кон украинската одбрана.

Второ, квалитетот на руските трупи не е добар. Кремљ можеби добро управува со силите – ја храни воената машина со нови трупи речиси три години – но квалитетот на оние што се борат на фронтот е, благо кажано, сомнителен. Недостигот на софистицираност на руското раководство, во комбинација со лошиот квалитет на руските трупи на фронтот, ги ограничува опциите.

Украински загуби

Тешко е да се одреди точниот број на загубите на Киев. За разлика од украинскиот колега, руското Министерство за одбрана нема кредибилитет, па секоја информација од Кремљ може да се игнорира. Од друга страна, Киев е разбирливо претпазлив во објавувањето на какви било податоци. Украинскиот претседател Володимир Зеленски повремено објавува некои бројки, но овие податоци се ретки.

Списанието „Национален интерес“ проценува дека вкупните загуби во конфликтот веројатно се околу 1 милион, а руските загуби го сочинуваат мнозинството. Написот на Wall Street Journal ја поддржува таа проценка. Според тој текст, доверливите украински проценки од почетокот на годината велат дека бројот на украинските загуби е околу 480.000 (80.000 убиени, 400.000 ранети).

Едно е сигурно: украинските сили претрпеа повеќе ранети отколку убиени во акција. Лицето на кое му е ампутиран екстремитет нема да може да се врати на фронтот - иако може да служи како оператор со дрон или инструктор - но војникот ранет од куршум може да се врати во борба.