Либанскиот министер за здравство Фирас Абијад изјави дека досега се потврдени девет лица загинати во серија експлозии на пејџери. Меѓу убиените има и осумгодишно девојче од долината Бека, рече Абиад, пренесува "Al Jazeera". Најмалку 2.800 луѓе се ранети, а повеќе од 200 се во критична состојба.

Се појави и вознемирувачко видео од моментот кога пејџерите експлодирале.

Регионалните телевизиски станици емитуваат снимки од безбедносни камери на кои се гледа спонтана експлозија на еден таков мал уред оставен покрај касата на продавницата. На друго видео, од експлозија е повредено лице кое стоело покрај овоштарник на пазарот.

Либанскиот центар за кризни операции, управуван од Министерството за здравство, ги повика сите медицински работници да се упатат во своите болници за да помогнат во лекувањето на огромниот број ранети кои пристигнуваат во одделот за итни случаи.

Здравствените работници се советувани да не користат пејџери.

Иранската новинска агенција "Мехр" објави дека во една од експлозиите е повреден иранскиот амбасадор во Либан, Мојтаба Амани.

Уредите биле хакирани?

Според првите информации, до експлозиите можело да дојде поради прегревање на батериите во уредите. Според истрагата на либанскиот радиодифузер "LBCI", првичните извештаи сугерираат дека пејџер-серверот бил хакиран, што значи дека е инсталирана скрипта што предизвикала преоптоварување. Ова веројатно резултирало со прегревање на литиумската батерија, која потоа експлодирала.

Повредите што ги претрпуваат корисниците на уредот се движат од мали до многу тешки, во зависност од областа на контакт на лицето со уредот, се наведува понатаму од "LBCI".