Холивудската актерка Џина Роуландс, номинирана за Оскар, чија филмска кариера траеше речиси седум децении, почина на 94-годишна возраст.
Роуландс беше позната и по работата во раната независна кинематографија со својот прв сопруг, режисерот Џон Касаветис, како и по филмовите популарни кај публиката во подоцнежната кариера, вклучително и „Hope Floats“ од 1998 година, во кој глумеше заедно со Сандра Булок, како и хит филмот „Бележникот“ (The Notebook) од 2004 година.
Таа беше номинирана за два Оскари, за филмовите „Жена под влијание“ (A Woman Under the Influence) од 1974 година и „Глорија“ (Gloria) од 1980 година – двата во режија на нејзиниот сопруг. Во 2015 година, актерката беше наградена со почесен Оскар, како признание за нејзините „извонредни животни достигнувања“ во кинематографијата.
Роуландс последните пет години живееше со Алцхајмерова болест, како што откри нејзиниот син Ник. Тој се присети на улога на неговата мајка во „Бележникот“ додека ликот се бореше со Алцхајмерова болест.
„Ја донесов мајка ми да ја глуми постарата Ели и поминавме многу време зборувајќи за Алцхајмерова болест и сакајќи да бидеме автентични за тоа, а сега, во последните пет години, таа има Алцхајмерова болест. Таа има силна деменција. И тоа е толку лудо, ние тоа го проживеевме, таа тоа го глумеше, а сега тоа е кај нас“, изјавил Ник.
Инаку, со истото заболување се соочувала и мајка ѝ на Роуландс, нешто за што зборуваше и самата актерка во 2004 година.
