Повеќето луѓе би требало да консумираат повеќе витамини, меѓутоа внесот на доволната количина може да биде предизвик.
„Витамините играат различни улоги во телесните функции, вклучувајќи метаболизам, имунолошка функција и обновување на клетките. Обезбедувањето соодветен внес на витамини може да помогне во спречување на хронични болести, подобрување на физичките и когнитивните перформанси и поттикнување на општата благосостојба, што заедно придонесува за подолг и поздрав живот“, вели д-р Кевин Кук, лекар специјализиран за медицина за долговечност и работа на мозокот.
Подолгиот и поздрав живот може да биде нашата главна цел. Ризикот од хронични болести се зголемува како што старееме, а д-р Кук вели дека внесот на доволна количина на еден одреден витамин по 50-та година може да биде од голема помош, иако многумина не го внесуваат доволно.
Витаминот Д е изборот број 1 за Кук за луѓето постари од 50 години.
„Витаминот Д е клучен за одржување на здравјето на коските, поддршка на имунолошките функции и намалување на воспалението. Докажано е дека витаминот Д помага кај депресија, го зголемува тестостеронот, го подобрува здравјето на коските, здравјето на мозокот и когницијата, го подобрува расположението и благосостојбата“, тврди докторот.
Сите овие работи можат да нѝ помогнат да водиме поздрав и посреќен живот. Покрај тоа, расположението, когнитивните функции и здравјето на коските се меѓу работите кои можат да се влошат како што старееме. Важноста на витаминот Д за луѓето кои стареат не е само мислење на д-р Кук.
„Постојат некои студии кои покажуваат дека ниските нивоа на витамин Д се поврзани со зголемена стапка на смртност од сите причини кај општата и постарата популација“, вели докторот.
Студија од 2023 година потврди и покажа дека 20 проценти од средовечните и постарите возрасни лица кои учествувале во студијата имале недостаток на витамин Д, што го зголемува ризикот од смрт од други причини.
Покрај тоа, студија од 2022 година спроведена на возрасни Кинези на возраст меѓу 60 и 113 години покажа дека луѓето кои немаат недостаток на витамин Д (или порано имале, но сега добиваат доволно) имаат помал ризик од смрт. Разликата била особено воочлива кај жените.
