Продажбата на возила произведени во Кина, целосно електрични и со внатрешно согорување, значително порасна во последниве неколку години, не само од кинеските производители на автомобили како „MG“ и „BYD“, туку и од увозните како што се „Tesla“, „Dacia“ и „BMW“.

Минатата година во Европа биле продадени околу 300.000 целосно електрични автомобили произведени во Кина, во споредба со 150.000 во 2021 година, според неодамнешното истражување на „Rhodium Group“.

Се очекува Европската комисија да ги објави резултатите од истрагата за поддршката на Пекинг за домашната индустрија на електрични возила, со можно зголемување на тарифите на околу 30 отсто од моменталните 10 отсто.

Европа подготвува одговор на кинеското рушење на цените

Минатата година, шефицата на Европската комисија, Урсула фон дер Лајен, предупреди на „поплава“ од евтини електрични возила чии цени биле вештачки намалени со кинески државни субвенции.

На пример, „BYD“ вели дека следната година ќе започне да го продава својот компактен електричен автомобил „Seagull“ во Европа за помалку од 20.000 евра, иако истиот се продава за околу 10.000 евра во Кина, што значи дека има многу простор за маневрирање во ценовната војна. Минатата година „BYD“ ја престигна „Tesla“ како најголем светски производител на електрични возила.

Додека производителите на автомобили ја чекаат одлуката на Комисијата, тие се подготвуваат за конкуренција со Кинезите во технологијата, ако не и во цените.

Директорот за маркетинг на „Hyundai Europe“, Андреас-Кристоф Хофман, вели дека водат внатрешни разговори за тоа како да се справат со растечката кинеска конкуренција и какви мерки можат да се преземат за да ја одбранат својата пазарна позиција.

„Ние навистина треба да останеме верни на нашите корени и нашите предности и единствени продажни точки“, рече Хофман на неодамнешниот настан на „Reuters“ за иднината на автомобилската индустрија во Минхен. „Зајакнувањето на нашите сили може да биде добар почеток. Пазарот и клиентите ќе одлучат“.

„Времето истекува“

Во меѓувреме, „Volkswagen Group“ ги повикува европските власти да воспостават регулаторна рамка во следните неколку години за да се обезбеди опстанок на германските и другите домашни производители на автомобили. Во спротивно, „VW“ нема да биде во рамноправна позиција за реална конкуренција со Кинезите во однос на трошоците, изјави Томас Шмал, член на управата на „VW“ задолжен за технологија, пренесува „Reuters“.

„Потребен нѝ е некој вид главен план. Времето нѝ истекува. Имаме две до три години. Ако не, германската индустрија навистина тешко ќе преживее“, рече тој.

Оваа засилена кинеска конкуренција става акцент на брзината како клучен диференцијален конкурентски фактор. „Во минатото, големината беше важна. Денес, тоа е брзината“, додава Шмал.

„За танго се потребни двајца“

Конкуренцијата од Кина и другите големи промени во индустријата, како што се електрификацијата и дигитализацијата, имаат потенцијал радикално да го преобликуваат европскиот автомобилски сектор до крајот на деценијата, велат Шмал и други.

Едно решение се партнерствата. Веќе сега „Stellantis“ ги здружи силите со кинескиот „Leapmotor“ за да продава и потенцијално да произведува кинески развиени електрични возила во Европа.

Шмал вели дека „за танго се потребни двајца“ додека производителите на автомобили бараат нови потенцијални партнери. Што се однесува до брзината, Шмал фигуративно се изразил: „Ќе биде рокенрол и дефинитивно ќе има помалку танчари на подиумот“.

Трошоците ќе се намалат, но многу внимателно

Европските производители на автомобили не се борат само со кинеската конкуренција, велат тие.

Уште една пречка се европските регулативи, имено „правилата во согласност со кои треба да се работи во Европа“, кои ги направија автомобилите поскапи во последните две децении, изјави генералниот директор на „Renault Italy“, Рафаеле Фусили на настанот на „Reuters“.

За да се избори со ова, „Renault“ сака да ги намали трошоците за производство за 40 отсто до 2027 година и да го намали времето на производство за една третина. Во исто време, целта е исто така да се биде долгорочно профитабилен.

„Сите сакаат да бидат одржливи и зелени, но ние мора да бидеме и профитабилни“, рече Фусили. „Сите сакаат да одат во рајот, но никој не сака да умре“.

Ова значи длабоки промени за „Renault“, вклучувајќи го и „веројатното“ воведување на помали, поефикасни батерии по пониска цена. Производителот на автомобили не планира да ги намали вработените или фабриките, туку планира да расте, рече Фусили.

Тој останува уверен дека, и покрај растечките продори од Кина, „има доволно време да се намали јазот“.

„Европските производители на автомобили ќе успеат, иако не преку ноќ“, вели Фусили и додава:

„Тоа ќе се случи, дури и ако не брзо. И ние ќе победиме“.