Арсенал беше во извонредна ситуација до пред една недела и со најдобри мисли влезе во четвртфиналето против Баерн Минхен, бидејќи покрај добрата форма, голема сатисфакција носеше и првото место во Премиер лигата.
Првиот меч на „Емирејтс“ заврши 2:2 и двата тима сега со подеднакви шанси влегуваат на реваншот кој се игра утре, но сепак Рио Фердинанд му дава мала предност на германскиот тим, пред се поради искуството и факторот домашен терен.
Арсенал во меѓувреме загуби од Астон Вила и го загуби првото место во домашното првенство, а Фердинанд прогнозира уште поцрна недела за „топчиите“ ако на крајот се оствари неговата прогноза.
– Мислам дека Баерн има предност на реваншот. Баерн игра дома и на своја страна го има цело искуство кое го има насобрано во Европа. Арсенал не е отпишан, може да победи, но јас му давам предност на Баерн. Замислете како ќе им биде да бибдат исфрлени од Хари Кејн?
– Натпреварот во среда е најголем за Арсенал оваа сезона. Ако загубат од Баерн, тимот на Артета никогаш нема да биде морално подоле. Ако навистина загубат, ќе бидам загрижен за Арсенал до крајот на сезоната, – изјави Фердинанд.
