Јужнокорејските научници одгледале говедски клетки во зрна ориз што е, како што велат, голем чекор кон постигнување одржлив, достапен и еколошки извор на протеини што би можел да го замени месото.
Професорот Џинки Хонг од Универзитетот Јонсеи во Сеул, кој го предводеше истражувањето објавено во списанието "Matter" овој месец, рече дека „говедскиот ориз“ е првиот производ од ваков вид. Користи житарки како основа за раст на животинските мускули и масни клетки.
Во истражувањето, зрната од ориз биле третирани со ензими за да се создаде оптимална средина за раст на клетките, а потоа на нив биле додадени говедски клетки за да се произведе финалниот хибриден производ, кој наликува на розово зрно ориз.
Тимот од Јонсеи не е првиот што работи на лабораториски месни производи. Компании ширум светот лансираа култивирано месо - едно од најновите вклучува пилешко и јагула од растително потекло од соја, кои се продаваат во Сингапур.
Тимот на Хонг изјави дека оризот има безбедносна предност во однос на сојата или јаткастите плодови бидејќи помалку луѓе се алергични на него.
Ако успешно се развие во прехранбен производ, култивираниот говедски ориз може да послужи како одржлив извор на протеини, особено во средини каде што традиционалното сточарство е непрактично, рече тој.
Говедскиот ориз содржи приближно осум проценти повеќе протеини и седум проценти повеќе масти од обичниот ориз. Хонг истакна дека протеинот во говедскиот ориз е 18 отсто од животинско потекло, што го прави богат извор на есенцијални аминокиселини.
Со цена од околу два долари за килограм и со далеку помал јаглерод од традиционалните говедски производи, култивираниот говедски ориз може да се натпреварува на полиците на продавниците, рече Хонг.
Хонг рече дека остануваат предизвиците од технички аспект и од аспект на придобивање клиенти, пренесува "Dnevnik.hr".
