Семињата содржат влакна, здрави масти и други хранливи материи кои позитивно влијаат на здравјето на организмот. Изборот на семиња кои можеме да ги консумираме е поголем, а порталот „Eat This, Not That“ открива кои семиња се најздрави за да се вклучат во исхраната.

Чиа семе

Чиа семето е вистински извор на хранливи материи. Порција од само 2 лажици содржи 9 грама влакна, 4 грама протеини и значителна количина на микронутриенти, вклучувајќи железо, магнезиум, фосфор и цинк. Тие претставуваат растителен извор на омега-3 масни киселини, го поддржуваат здравјето на срцето со намалување на вкупниот холестерол, триглицеридите и ЛДЛ (лошиот) холестерол, додека го зголемуваат ХДЛ (добриот) холестерол, според мета-анализата од 2021 година.

Ленено семе

Порција од 2 супени лажици ленено семе содржи 4 грама влакна, 2,5 грама протеини и 6 грама здрави омега-3 масни киселини. Лененото семе може да помогне при констипација, да го диверзифицира цревниот микробиом, да го намали систолниот и дијастолниот крвен притисок и да ги намали скоковите на шеќерот во крвта после оброк богат со јаглехидрати. Семките од лен содржат неколку важни микронутриенти, како што се бакар, манган и магнезиум.

Сусам

Семето од сусам доаѓа во три варијанти: бело, црно и златно кафеаво. Сусамот е добар извор на витамини Б1, Б3 и Б6. Витаминот Б6 е неопходен за метаболизмот на јаглехидрати, масти и протеини. Составен дел на семето од сусам се лигнаните, биоактивни и некалорични полифенолни материи кои имаат антивоспалителни својства.

Семки од тиква

Семките од тиква се многу хранливи. Тие содржат протеини, магнезиум и хранливи материи како што се фосфор, цинк, калиум и селен, антиоксиданти и здрави полизаситени и монозаситени масни киселини. Во семките од тиква може да се ужива како во алтернатива на грицките, но и во салати, супи и домашни и хранливи гранола барови.