Голем број лични работи биле уништени од водата и калта за време на минатонеделните разорни поплави во Италија.
Патиштата во неколку градови и населени места биле заглавени од облека, кревети, кабинети, каучи, телевизори, книги и секакви лични работи што жителите ги загубиле за време на невремето во североисточниот регион Емилија Ромања.
Во Фаенца, град во провинцијата Равена, 30 тони ѓубре – количина која обично се произведува во една година – сега е натрупано покрај патиштата и на периферијата на градот по големите поплави на 16 и 17 мај.
Волонтерите на цивилната заштита и армијата донеле 50 возила во обид да ги отстранат купиштата ѓубре од градот.
На само неколку километри од градот до автопатот се појавила огромна депонија со предмети на луѓето.
Сè на сè, се проценува дека во регионот има околу 100.000 тони ѓубре што треба да се отстрани. Тоа е количина што вообичаено се собира за 10 месеци во таа област, пишува локалниот весник "Il Resto del Karlino".
Шестмесечно количество дожд падна за само 36 часа минатата недела, што предизвика речиси дваесет реки во регионот околу Равена, Чезена и Форли да се излеат од коритата.
Мирор за време на викендот пишуваше за Мирела Берардинела, жителка на Форли, во регионот Емилија-Ромања, која на социјалните мрежи објави видеа и фотографии на кои вели дека изгубила сè, вклучувајќи го и имотот и нејзините миленици.
Друг жител на Форли, 34-годишниот студент Јуриј Галеоти, рекол дека се чувствувал „среќен“ бидејќи живее на третиот кат од неговата зграда и додека подрумот бил поплавен, водата не стигнала до неговиот стан.
Тој за The Local изјавил: „Сите соседи кои се на приземје или горе имаа два метри вода во нивните станови и сега сè треба да се фрли“.
По поплавите, жителите на тешко погодените области и оние од околните градови се приклучија на напорите за расчистување на патиштата и домовите на луѓето со лопати и трактори. Луѓето си помагаат за што побрзо да ја преболат оваа несреќа која ги снашла.
Поплавите имаа разорно влијание и врз земјоделството, а локалните власти соопштија дека најмалку 10 милиони овошни дрвја, вклучително и праска, кајсија и киви, ќе мора да бидат уништени бидејќи се непоправливо оштетени.
Емилија Ромања е меѓу главните производители на овошје и пченица во Европа, а меѓу настраданите во поплавите се и земјоделците кои ги губат приходите.
Се проценува дека сега се загрозени најмалку 50.000 работни места во земјоделскиот сектор, пренесува италијанската новинска агенција Анса.
Жителите се предупредуваат и на ризикот од ширење на инфекции и бактерии преку контаминирана вода.
Надлежните предупредиле дека поради загадената вода постои и ризик од гастроинтестинални инфекции од кои најчести симптоми се повраќање и дијареја.
Официјалните лица предупредија: „Не заборавајте да ги допирате очите, носот и устата со калливи раце и измијте ги со сапун и вода секогаш кога е можно“.
