Русија ќе мора да преземе контрамерки во врска со приемот на Финска во НАТО, изјави денеска портпаролот на Кремљ, Дмитриј Песков.
„Кремљ смета дека ова е уште една ескалација и дека проширувањето на НАТО е закана за нашата безбедност и за интересите на Руската Федерација. Ќе преземеме контрамерки за да ја обезбедиме сопствената безбедност и тактички и стратешки“, предупреди Песков, нагласувајќи дека Русија ќе одговори како што ѝ одговара, пренесе ТАСС.
Песков рече дека руската армија за се навремено ќе ја информира јавноста.
„Внимателно ќе го следиме развојот на настаните во Финска и ќе видиме како северноатлантскиот блок ќе ја користи територијата на Финска во врска со распоредувањето на оружје, системи и инфраструктура во близина на нашата граница, што потенцијално претставува закана за нас“, рече Песков, додавајќи дека соодветно ќе се преземат мерки.
Според него, ситуацијата во Финска е суштински различна од ситуацијата во Украина.
„Прво, Финска никогаш не била антируска и немавме спорови со Финска“, рече Песков.
Тој нагласи дека со Украина работите се сосема спротивни и дека ситуацијата таму е потенцијално поопасна.
„Затоа моравме да извршиме специјална воена операција за да ги постигнеме сите цели што ги поставивме“, заклучи Песков.
