Пронајдените посмртни останки на цивилите кои ги мачеле руските војници во текот на окупацијата на Херсон само го разгоруваат бесот на Украинците кои веќе се гневни поради претходно документираните злосторства – од силување па се до непредизвиканото убивање на невини цивили во Буча и Ирпин.

Во позадината, САД и Европа ја повикуваат Украина да ја остави на маса можноста за преговори, иако не сакаат да го принудуваа Киев на било што. Сепак, во вторникот украинскиот претседател Володимир Зеленски одговорил на тие повици, велејќи им на лидерите на Г20 да не и нудат на неговата земја апсолутно никаков мировен договор кој би ја компромитирал украинската независност од Русија.

Потоа претставил мировен план од 10 точки во кој бара од Русија да прифати одговорност за воените злосторства извршени на украинска територија. Исто така повикал на повлекување на сите руски трупи од украинската територија, вклучувајќи го регионот Донбас и полуостровот Крим, како и да платат воени репарации и компензација за предизвиканото уништување и смрт.

Тоа била негова верзија на одговорот кој американскиот генерал Ентони МекАулиф го дал на барање на Германците за негово предавање во текот на битката во Ардените во 1944-та – „Лудост“

Разликата, секако, е во фактот дека Зеленски и неговите луѓе не се обиколени, а остварија и две неверојатни победи на бојното поле – една во близина на Харков на североистокот на Украина и другата неодамна во регионот околу Херсон.

Украинците откажувањето од својата територија го сметаат за лудост

Како што стојат работите на бојното поле, украинската победа во Херсон ги уништила шансите на руските сили да го заземат брегот на Црното море, вклучувајќи ја Одеса, а сега и окупираниот Крим е во досегот на украинските ракети и артилерија.

Зборот „лудост“ исто така добро ја опишува и реакцијата на граѓаните на Украина со кои новинарот на „Politico“ разговарал оваа недела, прашувајќи ги дали би поддржале мировни преговори и дали сакаат да се откажат од територијата – Крим или Донбас – во име на мирот.

Јулија Григор, чиј сопруг моментално се лекува поради тежок облик на шок од граната, вели дека Украина може да победи во оваа војна ако Западот продолжи да и пружа поддршка. 35-годишната Јулија која е од Мариупол но сега живее во Лавов, рекла: „Русите не сфаќаат дека нема да се предадеме, да попуштиме или да преговараме, без разлика на тоа колку гранати ќе фрлат на нас. Не можат да не поделат“.

„Немаме за што да разговараме. Путин не разбира дека Украина е суверена земја и дека е обединета по ова прашање. Тој не го сфаќа ни значењето на зборот мир. Разговор со него нема смисла“, додала Јулија.

На прашањето за откажување од територии – Донбас или Крим – во име на мирот, таа одговара: „Тие територии се украински. Како да се откажеме од наша земја?“.

Јулија не е осамена во тој став. Новинарот разговарал со десетици други Украинци во подземната гаража во шопинг центарот во Лавов, кој сега служи како засолниште, а сите тие биле подеднакво непопустливи.

Група мажи во 50-тите години само одмавнале со главата кога новинарот ги споменал неодамнешните коментари на американскиот воен командант, генерал Марк Мили, кој рекол дека Украина можеби нема да успее да победи и дека зимата би можела да послужи како шанса за почеток на преговори со Русија.

Нагласувајќи ги воените проценки на Западот на почетокот на војната – дека Украина ќе мора да се предаде или ризикува целосна окупација за неколку дена – се покажале како погрешни, рекол 58-годишниот Олех и додал:

„Не се согласувам, и не може да има никакви преговори ни договори бидејќи Русија секогаш ќе ги крши сите договори. На нив не може да им се верува. Сите земји ги признаа украинските граници во 1991-ва година и ова е наша земја. Можеме да победиме ако САД и Европа продолжат да ни помагаат“.

Преговори како можност Русија да се вооружи

Млади или стари, запад или исток, сите Украинци со кои разговарал новинарот кажале нешто слично, а повеќето нагласуваат дека Русија преговорите ќе ги види како знак на слабост, ќе го искористи тоа време повторно да се вооружи и ќе обиде да окупира други делови од Украина. Единствено една млада жена нагласила дека можеби би била подготвена на откажување од Крим ако тоа значи крај на војната.

Никој не сака војната да се оддолжи, но поради новата самодоверба и бесот поради тоа што месеците војна го направиле во Украина, како и болката која војната ја предизвикала – загуба на животи, огромни штети и уништени семејства – многу Украинци не се расположени за никакви отстапки кон Русија за да се стави крај на војната. Се плашат дека било каков мировен договор кој не ги исполнува нивните услови би можел да предизвика траен судир, поради што Украина засекогаш би останала заробена како ничија земја – не била дел од Европа и не била играчка која Кремљ може да ја мачи.

Покојниот американски дипломат Ричард Холбрук, кој одиграл клучна улога во Дејтонскиот договор кој во 1995-та година довел до мир во Босна, знаел да каже дека судрените страни во војна до мировен договор ќе дојдат само тогаш кога ќе бидат сосема исцрпени.

Украина дефинитивно не е исцрпена – и покрај постојаните ракетни напади на енергетската мрежа, и покрај студот и стравот од долгата зима која следи.

Во четвртокот советникот на Зеленски, Андиј Јермак, постојаните напади на енергетската мрежа ги нарекол наивна тактика на кукавички губитници – додавајќи дека Украина веќе издржала екстремно тешки напад од страна на непријателот. „Тие не доведоа до резултатот на кој се надеваа руските кукавици“, рекол тој.

Мислењето во политичките кругови во Украина, но и на улиците, само се зацврстило од март, кога министрите за надворешни работи на Украина и Русија се обиделе да одржат преговори во Турција, прв пат по почетокот на руската инвазија. По 90-минутни разговори, двете страни кажале дека нема напредок.

„Сакам да нагласам дека Украина не се предаде, не се предава и нема да се предаде“, рекол лтогаш украинскиот министер за надворешни работи Дмитро Кулеба.

Тој ист март Зеленски за германските медиуми рекол дека е подготвен да размисли за компромис, иако веќе отфрлил било какво откажување од територии и прифаќање на руската анексија на Крим.

Зеленски сега изразува колективно отфрлање на било каков компромис од страна на Украина. Ако се суди по неговиот мировен план претставен на Г20, тој очекува Русија да се предаде.

„Едно е сигурно. Украинците не сакаат никакви преговори“, изјави во четвртокот портпаролот на Москва Дмитриј Песков. „И тоа веројатно најголемата вистина која Песков некогаш ја кажал. Украинците не сакаат преговори“, се заклучува во анализата на „Politico“.