Чоколадна торта без печење и со кремаст фил за многумина е омилениот десерт и одличен избор за домаќинките кога немаат многу време да подготват десерт кој се пече и долго се прави.

Уште подобро е тоа што филот се подготвува веднаш, а за истиот не ви е потребен ниту миксер.

Кората од тортата се подготвува од бисквити (исто како за чизкејк), така што ова ќе биде вистински избор за оние кои сакаат комбинација на бисквити и чоколадо.

Состојки:

- 200 грама мелени бисквити;
- 200 грама чоколадо;
- 700 милилитри млеко;
- 80 грама путер;
- 60 грама брашно;
- 30 грама шеќер;
- 7 грама желатин;
- ќесичка екстракт од ванила.

Подготовка:

Бисквитите и стопениот путер соединете ги во компактна смеса, па распоредете ја како кора во калап (24 центиметри). Претходниот калап обложете го со хартија за печење.

За филот:

Помешајте ги во тенџере брашното, шеќерот и желатинот, а потоа додадете млеко, па ванила. Сето тоа добро измешајте го и додадете го чоколадото кое сте го искршиле на коцки.

Загревајте ја смесата на умерен оган со постојано мешање додека не сте стопи чоколадото и сè не се соедини. Филот ставете го над кората.

Оставете ја тортата во фрижидер 3 часа, потоа изрендајте чоколадо над неа.

Наздравје!