Во првиот телефонски разговор меѓу претседателите на Русија и САД, Владимир Путин и Џо Бајден, биле потврдени длабоките несогласувања меѓу двете земји, но и потребата за интензивен дијалог, изјавил денеска портпаролот на Кремљ, Дмитриј Песков.
"Двете страни се согласни дека постојат длабоки несогласувања, што не значи дека дијалог не е можен, туку напротив - разликите бараат интензивен дијалог меѓу двете земји", рекол Песков во интервју за "ТВ Русија 1".
Според неговите зборови, разговорот кој двајцата лидери го имале на 26-ти јануари бил прагматичен и деловен.
Претседателот на Русија, Владимир Путин, на почетокот на оваа недела го потпишал Законот за продолжување на Договорот за намалување на стратешкото вооружување (Нов СТАРТ) на пет години, поточно до 5-ти февруари 2026-та година.
Американскиот претседател Џо Бајден исто така предложил петгодишно продолжување договорот, со кој Русија и САД меѓусебно се ограничуваат по прашањето за нуклеарното вооружување.
На почетокот на овој месец Москва потврдила дека двете земји постигнале договор за продолжување на Нов СТАРТ.
