Претседателот на САД, Доналд Трамп на рускиот претседател Владимир Путин му порачал дека сака да избегне скапа трка со Русија и Кина кога станува збор за вооружувањето и дека се надева на напредок во преговорите за контрола на вооружувањето.
„Претседателот Трамп повторно изрази надеж дека ќе се избегне скапата тространа трка во вооружување помеѓу Кина, Русија и Соединетите Американски Држави и се надева на напредок на скорешните преговори за контрола на вооружувањето во Виена“, изјави портпаролот на Белата куќа, Џад Дир.
Двајцата претседатели во телефонскиот разговор се осврнале и на иранската програма за развој на нуклеарно вооружување, информираа од Кремљ.
„И двете страни ја истакнаа потребата од колективни напори на одржување на регионалната стабилност и глобалниот режим за спречување на ширењето на нуклеарното вооружување“, соопштија од Кремљ.
Од Белата куќа не го споменаа Иран, но соопштија дека Трамп и Путин разговарале и за сузбивање на пандемијата на коронавирусот со истовремено отворање на глобалната економија.
Спороед американските власти, Кина како растечка нуклеарна сила треба да им се приклучи на САД и Русија во новиот договор. Но, сепак, 300-те нуклеарни боеви глави со колку што се проценува дека располага кинеската армија, се значително помалку од нуклеарниот арсенал со кој што располагаат САД и Русија.
Кинеските власти неодамна соопштија дека Кина би се приклучила на разговорите за контрола на вооружувањето со САД и Русија само доколку властите од Вашингтон се подготвени да го намалат својот нуклеарен арсенал на нивото на Кина, односно за 20 пати да биде намален амерканскиот нуклеарен арсенал.