Во последниве 24 часа регистрирани се 10 нови случаи на Ковид-19 во земјава, од кои шест од Скопје, двајца од Куманово и по еден случај во Прилеп и во Велес, информираше министерот за здравство Венко Филипче.
На Инфективната клиника во Скопје од коронавирусот починал еден пациент од Делчево, на 60 годишна возраст. Филипче рече дека пациентот имал малигни болести.
Во последниве 24 часа регистрирани се пет оздравени пациенти, а направени биле вкупно 189 тестови.
Вкупната бројка на заболени од коронавирусот во земјава, со последните податоци, изнесува 1.674. Од нив, 1.205 се оздравени, 92 лица починале, а активни случаи има 377.
На Клиниката за инфективни болести примени се тројца нови пациенти, со што вкупниот број хоспитализирани изнесува 41. Во болницата „8 Септември“ има 25 пациент, а во останатите болници во другите градови се хоспитализирани 64 пациенти.
