Почна самитот на ЕУ за Западен Балкан – Загреб 2020, кој оваа година се одржува со видеоконференција. Овој самит ја потврдува определбата на ЕУ дека регионот е составен дел на Европа и геостратешки приоритет за Европската Унија.
Премиерот Оливер Спасовски изразува искрена благодарност до нашите хрватски пријатели, лидерите на ЕУ-институциите и лидерите на земјите членки на ЕУ за можноста да се одржи самитот во видеоконференциска форма, што стана наша секојдневна реалност.
Самитот во Загреб е симболичен бидејќи точно пред 20 години исто така во овој град беше одржан првиот од серијата самити на кои се отвори европската перспектива за земјите од регионот.
Премиерот Спасовски на партнерите од ЕУ ќе им порача дека Северна Македонија е подготвена заедно со Европската комисија и Европскиот совет да ја закажеме првата меѓувладина конференција за да го почнеме преговарачкиот процес во согласност со новата методологија.
Самитот на ЕУ за Западен Балкан – Загреб 2020 се одржува за време на пандемијата на Ковид-19, но донесе и нешто позитивно – јасно ја покажа солидарноста на ЕУ за итна поддршка за здравствениот сектор и со финансискиот пакет за соочување со социо-економските последици и тоа ја прави Европската Унија единствена и посебна и посакуван дом и за нашите граѓани.
