Претседателот на ВМРО-ДПМНЕ, Христијан Мицкоски, се сретна со помошник-државниот секретар за Европа и Евроазија, Филип Рикер.
„На средбата се разговараше за актуелната политичка и економска состојба во државата, како и за реализацијата на стратешките цели на државава. Мицкоски посочи дека власта во овие моменти спроведува злоупотреба на институциите, нарачани обвиненија, притвори и пресуди. Лидерот на ВМРО-ДПМНЕ посочи дека власта врши сериозни нарушувања на правната држава и владеењето на правото и дека тоа државата ја уназадува во поглед на исполнување на стратешките приоритети и назадувањето на демократските процеси.
Воедно, тој истакна дека Република Македонија се соочува со сериозни економски проблеми, лош стандард на граѓаните и сиромаштија која е производ на недоволната ангажираност на Владата“, соопштија од ВМРО-ДПМНЕ.
Мицкоски ја истакна важноста на стратешкото партнерство на Македонија со своите сојузници и додаде дека клучна стратешка определба на ВМРО-ДПМНЕ останува интеграцијата во ЕУ и НАТО.
Соговорниците се согласија дека членството во НАТО и европската интеграција се клучен фактор за стабилност во нашиот регион и дека е потребна поддршка што ќе придонесе за остварување на овие цели.
